Gipuzkoa osoko 40 bat ikastetxetako 3 eta 6 urte bitarteko ikasleak Miramonera etortzen ari dira urtarrilaren 17tik 26ra, Euskadiko Orkestraren Musika Gela hezkuntza-zikloko ekoizpen hau ikustera. Ikuskizuna familiei ere zabalduko zaie: larunbatean, urtarrilak 27, 11:00etan eta 12:30ean Miramonen, eta igandean, urtarrilak 28, 17:00etan eta 18:30ean Gasteizko Garcia Lorca Antzokian. Sarrerak salgai daude 5 eurotik aurrera.

Musika Gelaren bigarren programa aste honetan eta hurrengoan burutuko da. Barroko garaiko musikak fantasiazko mundu batera eramango ditu 2.500 ikasle, non “artearen komediaren” estetikatik irtendako pertsonaia batek publikoarekin jolastuko duen objektu, erritmo eta doinu erreal zein irudimenezkoak deskubritzeko. Gidoirik gabeko kontzertua izango da, baina elementu musikalek eta jolas sinboliko eta ludikoek markatuko dute bidea. Pantomima honetan musikak aukera emango dio pertsonaiari publikoarekin eta musikariekin elkarreraginean aritzeko, antzerki-inprobisazioen bidez. Argazkiak hemen.

Musika Familian kontzertuak

Ikastetxeentzako egindako saioez gain, 3 eta 6 urte bitarteko haurrei zuzendutako Musika Familian kontzertuak ere izango dira. Egunak zehaztuta daude: larunbatean, urtarrilak 27, 11:00etan eta 12:30ean Miramonen, eta igandean, urtarrilak 28, 17:00etan eta 18:30ean Gasteizko Garcia Lorca Antzokian.

Kontzertu horietarako sarrerak salgai daude. Miramongo kontzertuetarako sarreren prezioa 5 euro da 12 urtetik beherakoentzat, eta 8 euro publiko orokorrarentzat. euskadikoorkestra.eus webgunean edo Kursaaleko leihatilan eskuratu ahal izango dira. Kontzertuaren egunean bertan ere eskuratu ahal izango dira Miramongo Egoitzako leihatilan, beti ere leku libreak geratzen badira.

Gasteizko kontzertuetarako sarrerak 6 euroko prezio bakarrean atera dira salmentara, principalantzokia.org webgunean eta Principal Antzokiko leihatilan.