40 urtean hamar aldiz handitu da munduan loditasuna duten umeen kopurua, eta Euskal Herria ez dago arazo horretatik salbu. Debagoienean PENSOI izeneko programa jarri zuten martxan orain lau urte eta orain sentsibilizazio kanpaina berria egingo dute.

Beste hainbat eragilerekin lankidetzan Debagoieneko ospitaletik abiatutako programa da PENSOI. Loditasun klinika dute bertan. Orain lau urte egindako ikerketaren arabera 6-12 urteko gaztetxo debagoiendarren artean herenak loditasun arazoak zituen.

Kanpaina berriak sentsibilizazioa du helburu, eta bi mezu nagusi zabaldu nahi dituzte bultzatzaileek:

. elikadura hobetu behar dugu
. bizitza osasungarria edo aktiboagoa egin behar dugu

Debagoieneko kirol teknikarien ordezkaria da Iñaki Ugarteburu eta haur loditasunari buruzko hainbat datu eman ditu Goiena telebistako Hemen Debagoiena saioan. Gainpisua eta loditasuna XXI. mendeko pandemia dela esan du eta arazo potoloa bihurtzen ari dela. “Saiatu behar dugu ematen ari den joera hori gelditzen, eta ahal dela atzera botatzen”.