Jakitera eman zituzten aurreko astean Euskadi Sarietako hiru irabazleak. Iñigo Astizek irabazi du aurtengoan HGL saria,  Joemak eta Polasak liburuagatik (Elkar, 2019).

Maite Mutuberriak ilustratutako obrak jolasera gonbidatzen gaitu poema bakoitzean, “bixi” irakurtzeko liburua da Astizek eta Mutuberriak osatu zutena, jostagarria, hitzen seriotasunari buelta ematen diona.

Liburua 8 urtetik goragoko haurrentzat sailkatuta egon arren, txikiagoekin ere funtzionatzen dute poesiek, saiatu zaitezte seme alabekin jolasten edo polasten… nahi duzuen moduan.

Liburuko poesia bat, “Dordoka txikiarena” Maite Aarroitajauregik (mursego)  musikatu zuen eta bideo honetan mimika proposamena ere egin zuten Iñigo Astiz eta berak.

Imanol Mercerok  berria egunkarian  iruzkina egin zuen liburua kaleratu zenean:

Nork esan du poesia gauza serioa izan behar duela? Poema liburu honek letrekin, hitzekin, esanahiekin eta soinuekin jolasteko gonbidapena luzatzen dio irakurleari.

Irakurketa aktiboa eskatzen du, idazle eta ilustratzailearekin batera jolastuko du irakurleak. Umorearen bitartez hizkuntzaren eta esanahien inguruan hausnartzeko gonbidapena da. Jolas mota desberdinak eskaintzen dira:

• Grafiarekin. Adib: “Oligrafo bat nola sortu”, “Sei”, “Eltxoa”,…

• Logika eta dedukzioarekin. Adib: “Deskubrimendua”, “Igogailuan”, “Botila itsasoan”,…

• Letrek orrian hartzen duten lekuarekin. Adib: “Kangurua eta arkakusoa”, “Lainoa”, “Gauza serioak”,…

• Letrak, silabak, hitzak antzaldatzen. Adib: “Puskak”, “Orbelagatik balitz”, “Kontrako norabidean”,…

• Mikroipuinak. Adib: “Zonbiak”, “Duelua”, “Behia”,…

• Paradoxak eta sofismak. Adib: “Karakola”, “Ura”, “Estralurtarra”,…

Teknika mistoarekin egindako ilustrazioak eskaintzen zaizkigu (ur-margoa, tinta, estanpazioa,…), kolorez ugariak. Poema bakoitzaren gainean txiki bat ageri da, eta tarteka orri bikoitzekoak daude (guztira sei). Oro har poemaren interpretazio librean ari dira, batzuk mezuarekin lotuta, gehienetan letra baten forma edota itxura agertzen kolore berezitu-beltzean.