Interneteko arriskuen gainean helduek eta gazteek duten iritzia erabat kontrakoa da

Otsailaren 11n izan zen Internet Seguruaren Eguna, eta egun horretan argitaratu zuten gazteek sarean duten arriskuen gaineko txostena. EU Kids Online europar proiektuak egin du txosten hori, eta Euskal Herriko Unibertsitateko kideek ere hartu dute parte ikerketa horretan.

Ikerlariek adierazi dute Interneten topa daitezkeen arriskuen eta arazoen gainean gaztetxoek eta helduek duten iritzia guztiz ezberdina dela. Izan ere, esperientzia positibo eta negatiboen artean ez dute garbi bereizten adingabekoek; hala, ohikoa da nerabeen artean sexu kutsua duten argazkiak bilatzea sarean eta horiek lagunekin elkarbanatzea.

Arriskuak ezagutu bai

Europako bederatzi herrialdetako 9 eta 16 urte arteko 349 adingabekok hartu dute parte ikerketarako egindako elkarrizketetan, tartean Espainiako, Belgikako eta Erresuma Batukoek. Elkarrizketatu horiendako Interneten dauden arriskurik handienak ondorengoak dira: bullyinga eta sexu jazarpena; pribatutasunaren aurkako abusuak; gogoz kontrako edo sexu kutsuko kontaktua ezezagunekin; eta publizitatea. Kontu horiekin zerikusia duten arazoen ia erdia sare sozialetan gertatzen da, Facebooken esaterako. Horrek erakusten du adingabekoek sare sozialen balizko arriskuak ezagutu ezagutzen dituztela. Baina, era berean, ez du esan gura arriskuok ekiditeko ezer egiten dutenik. Arriskuen berri jakin arren, gaztetxo batzuk ez diete batere garrantzirik ematen. Hala, elkarrizketatu batek zera dio txostenean: “Argazkiak dauzkat nire Facebook profilean, edonork ikus ditzake. Ez dut ezer txarrik jartzen, beraz, ez naiz arduratzen”.

Interneteko arriskuek gazteen garapenarekin zerikusia daukaten ia alderdi guztiei eragiten diete txostena egin duten ikerlarien esanetan: nortasunari eta sexualitateari; bikotekideen arteko eta lagunen arteko harremanei; eta moralari edo etikari dagokion garapenari.

Albistearen eta argazkiaren iturria hemen.