EITBk” IpuinTxiki, Soinu Handi” telesail berria estreinatu du aste honetan. Protagonista diren , aita-semeek, ipuin bizidunak kontatzen dituzte, bien artean istorioari ahots eta soinu-efektuak jarriz. “Fabula eta ipuinetako pertsonaiak genero-berdintasunaren eta aniztasunaren ikuspegitik sortuak dira”, adierazi dute euskal telebistatik.

Saioa astelehenetik ostiralera izango da ikusgai, 20: 30etik aurrera, ETB3n, 3 Ene Kantak eta Lotara saioen artean. Telebistan, 3 klubeko euskarri digitaletan eta app-ean egongo da ikusgai.

Saioek 6 minutu inguru dute eta ipuinetan eta hauentzako sortutako soinu-efektutan oinarritzen dira. Aitak istorioak kontatzen ditu, eta semeak pertsonaietako batzuei ahotsa jartzen die eta ekintzaren eta ingurunearen soinuak sortzen ditu. Hala, zazpi urteko haur bat kapituluen sortzaileetako bat eta protagonistetako bat bihurtzen da, bere ideiak, ahotsa eta “efektuak” ematen baititu, beste haur asko inspiratzeko helburuarekin.

Kapitulu bakoitzean argitaratu gabeko ipuin bat kontatzen dute, hiru eta sei urte bitarteko haurrek bizi dituzten eraldaketa fisiko, mental eta sozialetan oinarrituta. Ipuin bakoitzak ilustrazio berezi bat du, eta, beraz, pertsonaiak eta eszenatokiak desberdinak dira kapitulu bakoitzean. Ilustrazioak animatuak dira eta istorio bakoitzak bere unibertsoa dauka, kolorez, musikaz eta soinuz betea. “Ilustrazioak eta animazio-teknika aldatu egiten dira atal bakoitzean, eta serieari ikusizko aberastasun handia ematen zaio, ipuin bakoitzak pieza independente gisa funtziona dezan.


Era berean, atal bakoitzean, txikienek unibertso ezberdinekin egingo dute topo, non pertsonaiek beraien esperientziak bizi dituzten: janztea, gau osoan ohea busti gabe lo egitea, bakarrik jatea, ezkutatzeko korrika egitea, zubiak zeharkatzea, arrapalak igotzea eta igeri egitea, besteak beste; eta genero-identitatea, ingurumena zaintzea, desgaitasuna, elikadura eta garapen emozionala bezalako gaiekin “, jakinarazi dute Euskal Telebistatik.

Ipuin Txiki, Soinu Handi serieak, Señal Colombia eta LaPost-ek ekoiztua da eta “·Cuentazos con efectazos” jatorrizko titulua dauka, nazioarteko hainbat sari jaso ditu, besteak beste, teknika mistoko telesail onenaren saria Kidscreen 2021 jaialdian ( munduko animazio industriako ekitaldi garrantzitsuenetakoa).

Pantailatik aldendu eta ipuinak entzuteko aukera ere badago, telesaila podcast formatura egokituta egongo baida eta atal berri bat entzun ahal izango da egunero, astelehenetik ostiralera, EITBPodkast plataforman.