Lezoko Iratxe Lopetegi hezitzailearena da Instagrameko jolastenikasten kontua. Bertan askotariko jolasak edota eskulanak partekatzen ditu jendeari ideiak emateko helburuz eta eduki guztiak euskaraz igotzen ditu.

Noiz sortu zenuen Instagrameko jolastenikasten kontua?

Begiratu behar izan dut! 2019ko azaroan sortu nuen kontua. Egun arrunt batean, gehiegi pentsatu gabe.

Zein asmorekin sortu zenuen?

Ideiak partekatzeko asmoarekin sortu nuen, besterik gabe. Lehenagotik,nire sare sozialetan –pribatuak– partekatzen nituen etxean tarteka egiten genituen gauzak –jolasak, eskulanak…–, eta ingurukoei ideiak gustatzen zitzaizkien. Eta azkenean, lagunek animatu ninduten pixka bat kontua sortzera. Aholkuak eskatzen zizkidaten, zein material eta non erosi galdetu, opariak egiteko ideiak… Konturatu nintzen, jendeak ideiak izatea eskertzen zuela,eta hori ikusita sare sozialetan profil publikoa egitera animatu nintzen, guk egiten genituen ekintzak beste norbaiti baliagarriak izan zitezkeelakoan.

Kontuko sarreran hauxe diozu: “Umeek ez dute ikasten dutelako jolasten, baina jolasten dutelako ikasten dute”. Zein garrantzia dauka umearendako jolasteak?

Esaldi hori, Jean Piagetena da, eta ikasketak gauzatzen nenbilela entzun nuen lehen aldiz. Gerora, nire lanari esker umeak behatzeko aukera izan dut, eta orain seme-alabak behatzen ditut, eta esaldi hori hitzez hitz betetzen dela ziurtatu dezaket. Bai, uste dut jolasak berebiziko garrantzia duela gure bizitzatan. Txikitatik, esplorazioaren bidez ikasten dugu, edo esplorazioaren bidez goaz mundua ezagutzen. Umeak ez ditu bizitzea, ikastea eta jolastea bereizten, dena bat da beretzako. 

Umeekin egiteko askotariko eskulanak igotzen dituzu. Nolako edukiak sortzea duzu gustuko? Umeak parte hartzeko modukoak, umearen sormena garatzekoak, motrizitatea lantzen dutenak… Nolakoak?

Ez dira eskulanak soilik, esperimentazioa, mahai sentsorialak, material ezberdinekin egindako eskulanak, mahai jolasak… igotzen ditut. Denetariko edukiak sortzea gustatzen zait, eta jendearentzat prestatzea errazak izango diren ekintzak, denon eskura dauden gauzekin egin daitezkeenak.

Noski, umeek parte hartzeko egokiak dira, bi zaharrenek 5 eta 3 urte dituzte orain, baina zaharrenak urtebete inguru zuenetik egiten ditugu horrelakoak, eta bakoitzak bere gaitasunaren arabera parte hartzen du. Esperimentazioa, sormena, motrizitate fina… gauza asko landu daitezke ekintza berean… ez naiz gauza bakar bat garatzen zentratzen. Ekintzak aldatzen joaten naiz, dauden etaparen arabera, edo unearen arabera beraien beharrak, nahiak eta interesak ezberdinak dira eta hori da ekintza bat edo beste aurkeztearen arrazoia normalean.

Horiek prestatzeak lan handia suposatzen du?

Orokorrean ez. Normalean minutu gutxi batzuetan prestatzen diren gauzak egiten ditugu, garbi dago etxean txikiak dauden momentutik, denbora ateratzea zaila egiten dela –gurean behintzat–, beraz ez naiz gehiegi konplikatzen. Dena den, esan beharra dut, materialen armairua beti goraino beteta dagoela –kartoi mehearekin edo kartulinarekin, zeta paperarekin, kolarekin, tenperekin, buztinarekin, arrozarekin…– eta horrek asko laguntzen duela. Beti dut ideiaren bat buruan, eta edozein momentutan prestatzen dut esperimentazio mahai bat.

Egia da, orain zaharrena idazketa-irakurketa prozesu bete-betean murgilduta dagoela, eta etapa honetarako materiala lortzea zaila egiten zaidala, beraz material asko ni ari naiz sortzen, eta horrek bai suposatzen du denbora gehiago inbertitu beharra, baina prestaketa lan hori ere gustura egiten dut.

Zeure hiru umeekin batera egiten dituzu?

Bai. Beno, txikienak hiru hilabete ditu eta orain beste etapa batean dago, bere eskuak deskubritzearekin nahikoa du, baina, beste biekin batera aritzen naiz. Nahiz eta beraiek prestaketa lanetan gutxiago parte hartzen duten; normalean nik prestatzen ditut eta beraiei aurkezten diet ekintza.

Euskaraz egiten duzu guztia gainera. Zein balio erantsi ematen dio horrek?

Uste dut balio handia ematen diola. Horrelako edukiak erdaraz igotzen dituzten profil ugari daude, baina hasieratik garbi nuen nik euskaraz egingo nuela. Gure ama hizkuntza da, eta natural ateratzen zaidana da, ez nintzateke eroso sentituko erdaraz partekatzen gure ideiak. Euskarazko eduki gehiago sortu beharko genituzke, euskaldunok ez genuke erdarazko profiletara jotzeko beharra izan behar euskarazko material gehiago partekatuko bagenu.

Beste zerbait esatea gustatuko litzaizuke?

Jolasaren bidez mundua deskubritzen jarrai dezagun, haur zein heldu, eta euskaraz bada hobe!!! Eta noski, norbaitek laguntza behar badu edo zalantzarik baldin badu, lasai idatzi dezala eta ahal dudan neurrian laguntzeko prest nagoela.