Irriargi elkartekoei elkarrizketa

Irriargi, Goierriko familien elkartea da eta bizimodu kontzienteago baten alde egiten du lan. Informazio bat zabaltzeko eta esperientziak konpartitzeko beharraren ondorioz, 2010. urte hasieran elkartzen hasi ziren, eta gaur egun ere martxan dihardute. Guk elkarrizketa egin diegu elkartea ezagutzeko asmoarekin.

“Bizimodu kontzienteago baten alde, ekimen desberdinak antolatu behar dituen elkartea. Gurasoen topaketak antolatu, interesgarri diren gaiak landuaz; edoskitze taldea martxan jarriz eta indartuz… Bai barrurako baina baita kanpokoei ateak irekita utziz, interesa duen beste edozeini parte hartzeko aukera eskainiz.”

Noiz, nola eta zertarako sortu zenuten elkartea?

2010ean sortu genuen elkartea, Goierrin, gurasotasuna eta hazieraren inguruko esperientziak partekatzeko. Haurdunalditik hainbat erabaki hartu behar ditugu, eta sarri alde bakarreko informazioa jasotzen dugu. Erabaki ahal izateko aukera guztiak edo gehiago behintzat ezagutu behar direla sentitzen dugu guk.

Gure bilkuretan informazioa zein esperientziak konpartitzen ditugu talde barruan, baina kanpora begira ere hainbat ekintza antolatzen ditugu: hitzaldiak, formakuntzak…

Irriargi: bizimodu kontzienteago baten aldeko elkartea da. Zer da hau?

Lehen esan bezala haurdunalditik etengabe erabakiak hartu behar dira. Adibidez, etxean erditu ala ospitalean, txertoak jarri ala ez, bularra eman ala ez, hezkuntza mota… Gure sistema kapitalistan hazieraren eta zaintzaren inguruko balore batzuk dira nagusi eta maiz irizpide ekonomikoak gailentzen dira pertsonen beharren gainetik. Horregatik hain ohikoak ez diren praktiken aldeko erabakiren bat hartuz gero babestua sentitzea oso garrantzitsua da. Gure taldean denetik dago: etxean zein ospitalean erditutakoak, txertoak jarri zein jarri ez dituztenak… denok dugu lekua. Baina ez da gauza bera gauza bat egitea beste modurik ezagutzen ez duzulako edo informazioa lortu eta ideiak kontrastatu ondoren erabakia hartu eta gero nahiz eta azkenean ondorioa bera izan.

Horregatik urte hauetan guztietan kezkatzen gaituzten gai hauen inguruko hainbat saio antolatu ditugu.

Erditze kontzientearen aldeko hitzaldia. Etxean erditzen laguntzen duen emagin batekin eta gaiari buruzko liburua argitaratu duen psikologo batekin. Duela mende gutxi arte jaiotzen inguruko jakinduria emakumeena zen eta guk emakumearen ahalduntzea berreskuratu nahi dugu, bera izan dadila bere erditzearen jabe hautatutako bidea edozein delarik ere. Maiz egun erabiltzen diren teknikak oso inbasiboak dira eta ama objektu baten moduan tratatzen da eta ez aktiboa den subjektu baten moduan. Ez da amaren erritmoa errespetatzen, ez zaio kontsultatzen… Honek sekulako eragina du haur jaioberria eta amaren harremanean (atxikimendua).

Edoskitzea: edoskitze aholkularitza formazioa egin genuen 2013an eta edoskitzerako laguntza taldea eskaintzen dugu bi astean behin. Gai honen inguruan hitzaldiak ere antolatu izan ditugu hainbat aurreiritzi gainditzeko: edoskitzea eta lana uztartzeko moduak, esaterako. Azken hiru urteetan edoskitzearen inguruko argazki lehiaketa eta erakusketak antolatu ditugu (lehen momentuak, tandem edo garai ezberdinetan jaiotako seme-alabei bularra ematea, eta edoskitze luzea) eta honekin batera urri hasieran Edoskitzearen Mundu Mailako Egunarekin edoskitze festa.

Urte hauetan hainbat gai landu ditugu:

Hitzaldiak- hitzaldi tailerrak

Haurrak eta elikadura, lehen sorospenak, fardel berrerabilgarriak, psikomotrizitatea, hiperaktibitatea eta arreta gabezia, adimen emozionala, haurren parte-hartzea, hommeschooling, Bizi-toki eskolaren alternatiba, hilerokoa nola landu gure alabekin…

Formazio saioak

-Hezkidetza eta tratu onak

-Nerabeak eta komunikazioa. Saio bat nerabeekin, beste bat gurasoekin eta denon elkarrekin Etzak lo hartu antzezlana non gaia lantzen den.

-Aurten jolasen bidez emozioak lantzeko formazio bat egin nahi dugu.

Gaiaren arabera gurasoez gain, irakasleak, hezitzaileak, teknikariak, ikasleak… ere hurbildu izan dira.

Honez gain Beasaingo Udalarekin hitzarmena dugu eta bertako liburutegirako liburu batzuk ere proposatu ditugu. Horrela, jendeari aukera eskaintzen diogu modu batera edo bestera informatzeko.

Nola funtzionatzen duzue elkartean?

Hasieran astero elkartzen ginen, goizez. Gutako asko eszedentzian, amatasun bajarekin geunden. Gero lanean hasi ahala txandaka, aste bat goizez eta bestea arratsaldez. Orain haurrak handiagoak direnez gure lanbideei tarte gehiago eskaintzen diegu eta geroz eta arazo gehiago ditugu taldeari denbora eskaintzeko. Hasi ginenean lehen edo bigarren haurra zen, orain batzuk hiru dituzte eta lana eta familia uztartzea nahiko zaila da jendarte honetan.

Urteko plangintza egiten dugu eta ardurak banatu eta hilean behineko haziera bilkuretan gure kezkak, esperientziak eta ilusioak partekatzen saiatzen gara oztopoak oztopo.

Ze zalantza, kezka, zailtasun antzematen dituzue gurasoen artean?

– Haziera edo heziketari buruzkoak: gatazka egoerak nola kudeatu, anaia-arreben arteko harremanak, nola jokatu, adinaren arabera nola negoziatu beraiekin, frustrazioak, kasketak…

– Zure seme-alaba baztertua badago zer egin…

Zeintzuk dira zuen artean nagusitzen diren eztabaida gaiak?

Osasuna

-Gaixotasunen aurrean zer? Gorputzari entzun, zer esan nahi dute sintoma horiek (somatizazioa…) edo antibiotikoak / botikak eman eta sintomak desagerrarazi eta kito?

-Homeopatia osasun sistema publikoan nola txertatu daitekeen lantzen aritu ginen (estatu frantziarrean bezala)

Elikadura

-Elikadura. Sistemak elikadura mota bat bultzatzen du eta azken urteetan aldez aurretik prestaturiko janariarekin batera osasun arazoak areagotzen ari dira. Alergiak, intolerantziak… Jarraituriko elikadura eta kontsumo ohiturek jendarte eredu mota bat ala bestea sustatzen dute.

– Bertako produktuak erosi tokian tokiko ekoizleei. Barazki freskoak kontsumitu, haragi gutxiago, produktu ekologikoak, ekosistemaren oreka bilatze aldera…

-Prestaturiko janariak ( kontserbanteak,..) kontsumitu azalera handiko guneetan.

-Adibideak muturrekoak dira agian baina gure seme-alabei transmititu nahi diegunaren arabera lehentasuna gauza batean ala bestean jarriko dugu.

Edoskitzea

-Bularra eman nahi izanez gero eta arazoak badituzu sarri berehala biberoia emateko esaten dizute eta badaude hau lantzeko aholkulariak. Taldean formazio ikastaro bat egin genuen. Edoskitze garaia luzatzen baduzu ohikoa baino gehiago jendeak ez zaitu ulertzen eta babesa beharrezkoa da.

Zuen kezka eta gaiak eta  gurasoek orokorrean dituzten gai berdinak direla uste duzue? Edo aipatzen duzuen bizimodu kontzientearen apustua egin duzuen horiena soilik?

Orokorrean edozein gurasok dituen kezkak ditugu baina gai batzuetan agian sisteman nagusi diren baloreekin eta jokamoldeekin bat ez gatozenez (gaiaren arabera gutako batzuk bai, besteak ez…) gai batzuk desberdin bizi ditugu.

Laburtzeko, taldean denok ez dugu berdin pentsatzen gai guztietan baina agian elkartzen gaituela orokorrean ez-ulertuak edo erasotuak sentitu izan garela da. Eta taldean gure pozak, tristurak, zalantzak… partekatzeko gunea topatu dugu, gure tribua edo komunitatea.

Jendarte honetan joera batzuk dira nagusi eta badakigu oso zaila dela aldatzea baina elkarren babesean gurasotasunaren bidaia eramangarriagoa da.