Kaieraren egitasmoaren helburua hezkuntzarekin lotura duten gaiak arlo publikora eraman eta eztabaidak aberastera laguntzea da. Egunero argitaratzen dituzte edukiak eta guraso edo hezitzaile moduan intereskoak izan daitezkeelakoan egitasmoa ezagutzeko elkarrizketa egin diegu.

Zer da eta nola sortu zenuten Kaiera?

Kaiera egunkaria pertsona anitzen ahaleginaren emaitza da. Kalitatezko hezkuntzarekin konprometitua gauden jendea gara. Gure helburua hezkuntzarekin lotura duten gaiak eztabaida publikora zabaltzea da. Kaierak honako baloreak ditu oinarri: berdintasuna, aniztasuna, konpromezu etikoa, arrazoitzea eta zientifikoki frogatuta dagoena soilik zabaltzea. Informazio baliagarria helarazi nahi diegu euskal hezkuntzako profesionalei, bai eta hezkuntzarekin lotura duten pertsona guztiei.


Atal ezberdinetan antolatzen dituzue argitalpenak. Zeintzuk dira ?


Kaieran 7 atal ezberdin ditugu: Ebidentziak, Esperientziak, Gaurkotasuna, Indarkeria 0, Baliabideak, Eztabaidak eta Erraldoien Sorbaldetan. Atalak asteko egun finko batean argitaratzen ditugu egunkariari sendotasuna ematearren.
Ebidentzien atalean nazioartean argitaratzen diren lan zientifiko baliagarriak euskaraz zabaltzen ditugu, hezkuntza arloko ebidentzia zientifikoak euskal irakaslegoak zein bestelako hezkuntza-profesionalek eskura izan ditzaten. Artikulu originala beti dago estekatuta gure argitalpenetan, interesa duten horiek iturrira jo dezaten.


Esperientzia atalaren helburua eskoletan egiten diren praktika onenak jasotzea eta hedatzea da, ondoen funtzionatzen duten jardueren berri emanez.  Atal honetan argitaratzen diren esperientziak aukeratzeko, oinarri zientifiko eta emaitz onak izatea berebiziko irizpidea da.


Gaurkotasuna sailean hezkuntzarekin lotutako albisteak argitaratzen ditugu, ingurukoak zein nazioartekoak. Atal honek jardunaldi zientifikoen berri eta publikoen berri ere ematen du.


Indarkeria 0 atalari dagokionez, indarkeriaren kontra argitaratzen diren lan zientifikoak argitaratzen ditugu, baita elkarrizketak eta esperientziak ere.

Baliabideen atalen irakasleentzat interesgarriak izan daitezkeen argitalpenak plazaratzen ditugu, ikasgeletan lantzeko interesgarriak izan daitezkeenak: bideoak, web-orriak edo liburuak, besteak beste.
Eztabaidak ere argitaratu izan ditugu, hezkuntza alorrean garrantzitsuak diren eta pil-pilean dauden gaiei buruz iritzi ezberdinak mahai gainean jartzeko.


Erraldoien Sorbalda Gainean atalean hezkuntzarako ekarpen garrantzitsuak egin dituzten autoreei buruzko artikuluak edo erreferente diren praktikei buruzko artikuluak argitaratzen ditugu.


Nori zuzendutako egunerokoa da?
Hasieran, irakasleei zuzendutako egunkaria bezala jaio zen. Hala ere, hezkuntzan interesa duen edonori zuzenduta dago egun: irakasleak, eskoletako beste langileak, hezkuntza ez-formalean lan egiten duten pertsonak, eta, noski, familiak eta irakasle izateko ikasten ari diren pertsonak. Hezkuntzak gizarte osoan eragina duen neurrian, Kaierak zabalera hori kontuan hartzea bilatu genuen. Izan ere, aspalditik nazioarteko ikerketak azpimarratu du hezkuntza-arrakastarako komunitate osoak duela zeresana.


Nork sortzen du edukia? Kolaboratzaile anitzak dituzue?
Kaieran argi daukagu zenbat eta aniztasun handiagoa egon, handiagoa izango dela gure egunkariaren kalitatea. Hartara, egun 80 kolaboratzailetik gora dugu. Haien artean, aniztasun handia dago adinari eta profil profesionalari dagokionez: ikasleek, eskoletako langileek, unibertsitateetako irakasleek edota erretiratuak dauden pertsonek idazten dute Kaieran. Bestalde, guztien arteko elkarrizketaren bitartez, kolaboratzaileen interesak kontuan hartzen dira argitalpenak esleitzerako orduan.


Jendarteari irekita dagoen egitasmoa da Kaiera? Nahikoa hausnartzen al dugu hezkuntzaz?


Kaiera doako egunkaria da, eta online argitaratzen da espazio orotara helarazi nahian. Hartara, hezkuntzari lotutako eztabaidak ebidentziekin elikatu nahi ditugu. Izan ere, medikuntzan ez bezala, hezkuntza iritzien esparrua izan ohi da, eta maiz eramaten dira praktikara inoiz frogatu ez diren ekimenak, ondo funtzionatzen duten ez dakigun ekimenak. Hainbatek animatu egiten dute hori egitera. Kaierarekin ume guztien kalitatezko hezkuntzaren eskubidearen alde egin nahi dugu, orain arte zientziaren babesa duten praktikei eta jarduerei buruz eztabaidatuz. Gure ustez, amaitu da “besteen umeekin” esperimentatzeko garaia hezkuntzari dagokionez, bereziki iturri zientifikoetara jo eta emaitzak eta ebidentziak eskura ditugun neurrian. Askotan, debate eta hausnarketetan, ez dira argudio zientifikoak kontuan hartzen, norberaren iritziak baizik; horrek ez du hezkuntza hobetzera laguntzen. Horregatik, uste dugu horren behar handia dagoela