Bolo-bolo dabil zurrunbiloa ikastetxe batzuetako ikasgeletan EAEko Hezkuntza Sailak kamerak jartzeari ekin diolako. Ez da gutxiagorako. Gure ingurura ere heldu dira… eta etxeko nerabea erabat asaldatuta etorri da. Lasaitua hartu dut zuzendaritzak erabaki horren aurkako neurriak hartu dituelako nahiz eta instalatzeari uko egiterik ez duten izan. Kontua da, nahi edo ez, ikasgeletan daudela tresna horiek eta behin jarrita kentzea ia ezinezkoa izango dela iruditzen zaidala. Ez nago ados beharrezkoak direnaren kontuarekin eta ez zait nahikoa iruditzen balizko beste konfinamendu arrazoirik balego beharrezkoak izango direnaren argudioarekin. Badakit errealitate oso desberdinak daudela ikasgeletan eta saioak jarraitzea ezinbestekoa izateaz gain, ikasleen eskubidea dela horiek jaso ahal izatea. Ez zegoen beste modurik benetan? Ikastetxeek baliabideak falta dituzte egunerokoan. Fotokopiak zenbatzen aritu behar izatea, haurrek eskola materiala etxetik ez eraman behar izatea, komuneko papera eta irakasle gehiago. Baliabide fisikoak eta humanoak. Kamerak ikasgeletan jartzeko erabiliko den dirutza hori ezin zen beste inola erabili? Gaitasun digitalak beharrezkoak direnaren aitzakian Chromebook bat eskuartean bai ikastetxean zein etxean erabili behar izateak nahiko hazkura sortzen dit. Alferrikakoa da mugikorrean gurasoen kontrolerako tresnak ezartzea gero ikastetxetik beste gailu bat erabiltzera derrigortuko badituzte inolako kontrolik gabe… eta hori nahikoa ez eta ikastetxeak beraien intimitatea erabat urratu dezaketen kamerez betetzeari ekin diote. Nik ez dut eman inolako baimenik ikasgelan seme-alabak dauden bitartean etengabe grabatuak izan daitezen eta gainera zuzenean emititu dadin beraien irudi hori nahiz eta ustez seguruak izango diren kanalak erabili (eta hau ere, oso zalantzan jarriko nuke…). Eta ez dut emango ere. Baimenik ematen ez badut nola kudeatuko da hori? Nire seme-alaben irudi eskubideak eta datuen babesa noren erantzukizuna izango dira? Adimen artifizialaren aroan eta pedofilia gorakada argian dagoen unean noren burutazioa izan da adin txikikoak seguru egon beharko liratekeen espazioak sarera konektatuko diren kamerez betetzea? Nork eta nola babestuko dira ikasgela horietan lanean ari direnen oinarrizko eskubideak? Eman al dute grabatuak izateko baimenik? Zenbat fotokopia kabitzen dira kamera bakarraren aurrekontuan? Eta noiz egingo dugu benetan planto halako neurrien aurrean?