Eskola, Komunitatea, Kirola, Osasuna (EKKO) izeneko proiektu hezitzailea garatzen dihardute Aretxabaletan eta Eskoriatzan, eta Arrasateko Udala ere batu da egitasmora, Arizmendi Ikastolarekin eta Arrasate Herri Eskolarekin elkarlanean.

Haurren trebetasun sozialak lantzeko dinamizazio estrategiak izeneko ikastaroa jarriko dute martxan irailean; begiraleei dago zuzenduta, eta izena eman daiteke jada. Horri buruzko elkarrizketa egin diogu Huheziko etengabeko prestakuntzako zuzendari Karmele Perezi.

Proiektuaren lehen fasea izango da ikastaroa, ezta?

Asmoa begiraleei trebetasun sozio-emozionalak garatzeko tresnak ematea da, ondoren haiek LH-5 eta LH-6 mailetako ikasleekin esku hartu dezaten.

Irailetik 16tik abenduaren 3ra iraungo du fase horrek.

100 orduko ikastaroa izango da; 50 ordu inguru modu presentzialean emango ditugu Huhezin, ostegunetan, gehienbat, eta gainontzeko orduak esku hartzeak diseinatzen, eskolak bisitatzen, ikasleekin harremanak egiten… pasako dituzte begiraleek.

Nork eman dezake izena, eta nola?

BAZen eta Arrasate.eus atarian eman daiteke izena, datorren astera arte. Hogei lagunentzako tokia egongo da. Guk irudikatzen dugu izena ematen dutenak eskolaz kanpo ere izango direla neska-mutilak eragiteko gai; udalekuetan, entrenamenduetan, gazte txokoetan… Aisialdian aritzen diren hezitzaile gazteak erakarri nahiko genituzke, baina badute tokia hezkuntza formaleko irakasleek eta udal teknikariek ere.

Ze gaitasun landuko dira ikastaroan?

Autoestimuan, komunikazioan, erabakiak hartzean, arazoak konpontzean eta pertsonen ar- teko interakzioan jarriko dugu fokua. Errealitatean oinarritu- tako erronkak garatuko dituzte begiraleek, erronka horiei aurre egiteko tresnak barneratuko dituzte eta gai izango dira tres- na hauek gaztetxoekin erabil- tzeko; modu horretan, neska-mu- tilek erreferente positiboak izango dituzte euren bizi-gara- penean.

San Juan de Dios osasun zentroak eta Aretxabaleta kirol elkarteak egindako ikerketatik atera duzue ondorio hori.

DBHko ikasleei galdetegia pasa zieten, drogamenpekotasunaren prebentzioa nola egin jakiteko. Emaitzak eskuan, konturatu ziren gazteagoekin, LHko ikasleekin, hasi beharra zegoela lan hori gauzatzen. EKKO testuinguru horretan kokatzen da. Proiektu horren arduradunak Huhezira etorri ziren ea begiraleak formatzeko ikastaroa antolatuko genukeen galdezka. San Juan de Dios ospitaleko profesionalek landuta daukate ze ariketa mota egin daitezkeen gaztetxoekin. Guk egin duguna da eduki horiek hartu eta dinamizazio fasean jarri; hau da, moduak eta estrategiak diseinatu ditugu.

2023an hasiko litzateke bigarren fasea.

Ikasitakoa praktikan jarriko dute begiraleek, eskoletan lehenengo, eta eskolaz kanpo gero. Fase hori Arrasateko Udaleko Gizarte Zerbitzuek kudeatuko dute urtarriletik aurrera: antolaketa, kontratazioak… Proiektua bi urtean garatzeko egin da.