“Liburutegia batez ere elkartzeko toki bat da, baina baita kulturalki herria dinamizatzeko tresna ere”. Ideia horrekin laburbildu du Koldo Edorta Carranza Diezek (Eibar, 1990), Lekeitioko Udal Liburutegiko liburuzainak, gaur egungo liburutegiek bete beharreko rola. Adierazpenok UEUk egin dion elkarrizketan jaso dira, Informazio eta Dokumentazio Kudeatzaileen XII. Bilkuraren harira.

Aurtengo bilkuraren gaia Informazio zentroen birmoldaketa eta berrikuntza: espazioen eta zerbitzuen eraldaketa izan da, eta Carranzak Lekeitioko Udal Liburutegia eraldatzeko herritarrekin batera garatutako prozesu parte-hartzailearen berri eman du.

Azaldu duenez, liburutegiaren eraldaketaren abiapuntua herritarren beharrak izan dira. Umeentzako espazio gehiago eskatu izan dituzte urte luzez, eta horrek agerian utzi zuen espazioaren antolaketa berritzeko beharra.

Prozesua Arropaineko Arraguaren laguntzarekin egin dute, herritarren iritzia eta beharrizanak jasotzeko tailerrak, bilerak eta ate irekien saioak antolatuz. Carranzaren hitzetan, “oso pozik” daude parte-hartzearekin, hainbat elkarte eta erakundetako ordezkariekin talde eragilea osatzea eta herritarren ekarpen ugari jasotzea lortu baitute.

Liburutegia, ezagutza partekatzeko gunea

Ekarpen horiekin osatutako proiektuak liburutegiaren ikuspegi tradizionala gainditu nahi du. Liburuak mailegatzeko edo irakurtzeko lekua izatetik harago, ezagutza partekatzeko gune bihurtu nahi dute. Horretarako, herritarrek beren proposamenak aurkezteko deialdia egingo dute; liburutegiak espazioa eta baliabideak eskainita.

Espazioei dagokienez, haurrentzako eta familientzako txoko berriak sortuko dituzte, kasgela lekuz aldatuko dute ordutegi zabalagoa izan dezan, eta elkarlanean edo hitz eginez ikasteko gune berriak ere prestatuko dituzte.

Carranzaren ustez, liburutegien egitekoa askoz zabalagoa da gaur egun: “Leku demokratikoa da; edonor etor daiteke, komunitatea sortzen du, eta ez da bakarrik liburuak irakurtzeko tokia, baizik eta edozein ezagutza partekatzeko gunea”. Bere esanetan, Lekeition martxan jarritako eraldaketa-proiektuak ikuspegi horri erantzun nahi dio.

Bilkuraren inguruan ere balorazio baikorra egin du. Horrelako topaketek ezagutza trukatzeko eta adituen zein herritarren ekarpenak jasotzeko aukera ematen dutela nabarmendu du, eta prozesuan aurrera egiteko indarra ematen dietela gaineratu du.