Urtarrilaren 4an egin zuten estreinaldia Oñatiko Santa Ana aretoan. Familia kontzertua da eta emozioak dira helburu pedagogikoa duen obra egituratzen duen gai nagusia.

Anna Llenasen ipuin bat abiapuntu hartuta, Koloretako Munstroa ikuskizuna sortu du Ganbara Faktoriak.

Maxk izeneko munstroa da ikuskizunaren protagonista, eta hark sentitzen duen emozio-korapiloa askatzeko beharra dela-eta, lotsa, maitasuna, beldurra eta aitzakia bezalako sentipenak ekartzen dira oholtza gainera. Hamar emozio denera, bakoitza kantu eta eszenografia banarekin jantzita: “Modu horretan, emozio bakoitzak bere deskribapena du, eta etxeko txikiek jakingo dute lotsatzen garenean, edo maitemintzean, zer den barruan sentitzen duguna” azaldu du Ganbara Txiki abesbatzaren eta Koloretako Munstroa ikuskizunaren zuzendari Aitor Biain-Bidartek.

30 lagun inguruk hartzen dute parte ikuskizunean: 9 eta 12 urte bitarteko Ganbara Txikiko 25 lagunek; Eli Mendiaraz piano-jotzaileak; narratzaile lanak egingo dituen Miel Guridik; Maxk munstroari ahotsa jartzen dion Txomin Maidaganek; eta munstroari bizia ematen dion Aitor Garitanok.

Hemen pasarte batzuk. Emanaldi bakarra egin dute. Oraingoz ez dago besterik iragarrita.