Online erreminta berria da Kontzilia. Helburua da kontziliaziorako neurriak hartzen laguntzeko beharrezko informazioa eskaintzea. Enpresei zein langileei zuzenduta dago, eta gaiaren inguruko materiala aurkitu daiteke bertan. COVID-19aren eraginez sortu diren behar eta egoera berriei erantzuteko, kontziliazioa erregulatzen duen araudi berria ere jaso dute bertan. Banakako online kontsultak egiteko aukera ere eskaintzen du.

Eusko Jaurlaritzako Berdintasun, Justizia eta Gizarte Politika Sailaren egitasmoa da Kontzilia. Norberaren, familiaren eta lanaren kontziliazio erantzunkidearekin lotutako gaiei buruzko informazioa eta gogoeta egiteko tresna dela azpimarratu dute.

Hiru atal nagusi

Hiru ataletan antolatuta dago Kontzilia: ‘Kontziliazioa erantzunkidea’, ‘Kontziliazioa Enpresak’ eta ‘Kontziliazioa Langileak’.

Kontziliazio erantzunkidea atalean kontziliazioari buruzko informazio orokorra aurkitu daiteke (araudia eta jurisprudentzia, dokumentazioa, kontziliazio-neurriak, dirulaguntzak, azterlanak…).

Kontziliazioa Enpresak izeneko atalak baliabideak jasotzen ditu enpresek kontziliazioaren aldeko apustua hobetu dezaten (laguntzak, araudia, ohiko galderak, erremintak, kontziliazioaren onurak, jardunbide egokiak…)

Kontziliazioa Langileak atalean familientzako dauden kontziliaziorako laguntzen gaineko informazioa dago jasota: kontziliazio-neurriak, dirulaguntzak, eskabide-ereduak, ohiko galderak, araudia… Eta horiek nola baliatu jakiteko informazioa dago.

Online kontsultak

Kontzilia-n, kontziliazio erantzunkidearekin lotutako kasu partikularrei buruzko kontsultak egin daitezke: nola eskatu kontziliazio-neurri bat enpresan, zer kontziliazio-aukera dauden, aplikatu beharreko araudia zein den, etab.

Horretarako mezu bat bidali behar da kontzilia@euskadi.eus helbide elektronikora, gaian ‘kontziliazioari buruzko kontsulta’ adieraziz.