Pare bat orduko mendi buelta da gaurkoan proposatzera gatozena. Orioko hondartzatik abiatuko gara eta Kukuarri izeneko mendi tontorra egingo dugu atzera ere Oriora itzultzeko.

Mendi buelta bati buruz ari gara, beraz komeni da familian bagoaz haurrak ibiltzera ohituta egotea.

Donostia eta Orio artean dagoen Mendizorrotz mendiko mendigunearen gailurretako bat da Kukuarri. Tontor apala da (377 m.) baina ederra da bertatik dugun ikuspegia; Orioko eta Kantauriko kostako panoramika paregabea alde batetik, itsaso zabala bestetik eta inguruko mendi lerro gehienak bistan bestetik.

Ibilbidea

Esan moduan Orioko hondartzatik aldapan gora abiatzen den bidea hartuko dugu hasieran. Dezente igoko gara hasiera batean eta gero etorriko dira eremu lauagoak.

Une bat egongo da non Itsaspe izeneko etxe baten paretik igaroko garen. Gora jarraitu behar dugu eta izen bereko beste etxe baten ondotik pasako gara. Gora jarraitu beharko dugu tontorrera iritsi arte. Hainbat bidexka zabaltzen dira; motzagoak edo laburragoak guztiak ailegatzen dira Kukuarrira.

Tontorrean urrutitik ikus daitekeen gurutze handi bat dago. Haren aldamenean Kukuarriko Andra Mari dago, Oteiza eskultoreak egindakoa.

Buelta egiteko erromatar kaltzada hartuko dugu. Kontuz tontorrean; izan ere, hainbat bide daude eta bakoitzak leku batera eramaten du.

Oriora jaisteko guztiz ezkerrean daudena baino aldamenekoa hartuko dugu. Laster batean pasa beharko dugu abereak dauden eta txabola bat duen zelaitik. Libre da pasatzea, beti ere atakak ondo itxita uzten baditugu.

Bidean behera jarraituta erromatar galtzada ikusiko dugu. Nahiko ondo mantentzen dena eta basoz inguratuta dagoena. Adi ibili; izan ere perretxiko batzuk agertzen dira sasoi bada.

Itxaspeko bidegurutzera irtengo gara behin menditik jaitsita. Errepidearekin egingo dugu topo. Gurutzatu eta behera jarraitzen badugu Orio herrira jaitsiko gara. Aldiz, gurutzatu gabe oinezkoentzako eginda dagoen bidea hartzen badugu Orioko hondartza ingurura jaitsiko gara berriz.