Bi liburu gomendio ekarri ditugu gaurkoan Galtzagorri elkartetik . Astero eskaintzen digute gomendio bat beraien webgunean eta guraso eta hezitzaileentzako oso baliagarriak direlakoan guraso.eus era ere ekartzen ditugu. Hona hemen gaurko bi gomendioak.

Julieta, Romeo eta saguak

Idazlea: Mariasun Landa. Ilustratzailea: Asun Balzola. Erein, 2021 [1994].

Zer da paradisua? Zer da enamoratuta egotea? Halako galderei ematen dizkien erantzunak lurretik oso gertu daude: tarta jatea edo rocka dantzatzea, esaterako. Mariasun Landak berak dioen bezala, liburuaren izenburua poliki irakurri beharra dago hariak nondik nora harilkatuko diren jakiteko.

Julieta bakarrik bizi da. Neska mokofina da, pixka bat potoloa, saguez inguratuta bizi dena. Romeo agertu eta dena aldatuko da. Istorio dibertigarria da eta, Landak aitortu duenez, berak ere ederki pasa zuen idatzi bitartean. Estereotipo bat baino gehiago apurtuko zaie irakurleei. Izan ere, nola ikusiko da mundua saguen begietatik?

Ilustrazioak Asun Balzolak egin zituen eta 1994ean argitaratu zuten lehenengoz. Orain, Erein etxeak edizio berritua plazaratu du.

Beren kabuz irakurtzen duten haurrei zuzenduta dago.

Galtzagorri elkartea (2021-05-03)

Hona hemen Bere garaian Felipe Juaristik egindako kritika iruzkinaren zati bat:

Oso detaile politak ditu liburuak. Kapituluak izendatzeko era oso da sujerikorra. Esaterako, lehen kapituluan galdera hauxe irakurtzen dugu: Zer da paradisua? Erantzuna berehala dator, piska bat beheraxeago: Tarta jatea eta rock-a dantzatzea. Garbi dago, galdera traszendental bati halako erantzuna emateko sagua izan behar dela, edo haurra bestela. Izan ere, saguak dira liburu honetako pertsonaiak, oso kezkaturik daudenak, Julieta potolinak jateari utzi nahi diolako. Julieta hori da liburuko heroina. Ispiluari begiratzen dio eta, horiek gezurrik esaten ez dutenez, bere burua ikusten du hipopotamoaren antzera, oso lodia, alegia. Eta hor hasten dira saguen arrenkurak. Julieta, bestalde, maitemindu egiten da, eta saguek berehala ikasten dute zer nolako ondorioa dakarren umore horrek. Zer da enamoratuta egotea?, galdetuko diote beren buruari. Eta ernatzuna ere berehalaxe asmatuko dute. Zer izango da bada? Tarta purea bailitzan jatea. Saguek ondo bizi nahi.

Mariasun Landak liburu honetan, beste askotan bezalaxe, emakumearekiko grina eta konplizidadea erakusten digu. Emakumeen egoera normal bat agertzen digu, lodi sentitzearena, maiteminduta egotearena. Eta umorez eta ironiaz irtenbidea ematen dio. Amaiera, noski, oso positiboa da, eta hala behar du izan, hobe esanda, haraino darama liburuaren desarroiloak berak. Ez dut esan oraindik, baduela liburuak beste detaile polit bat. Liburua ilustratzeko jarriak dauden mararzkiak Asun Balzolarenak direla. Nik neuk frogatu dudalako esan dezaket, neska-mutilei arrunt gustatzen zaizkiela klase horretako marrazkiak, eta haurrek liburu bat lehendabizi begiekin ulertzen dutela. Hain da garrantzizkoa marrazkigilearen lana liburu bat ederra izan dadin! Galdera batez formulatu beharko bagenu gure teoria hauxe izango liztateke, dudarik ez: Zer da haurrentzako liburu bat? Eta erantzuna segidan: Marrazkiak (edo santuak) dituena.

Amatxoren jertsea.

Egilea: Jayde Perkin. Itzultzailea: Amets Santxez (Bakun). Ibaizabal, 2021.

Formatu handiko eta azal gogorreko liburua da, 6-8 urte bitarteko haurrentzat aproposa. Heriotzari buruzko liburua da, zehazkiago esanda galerari buruzkoa. Behar baina ezohikoagoa da haurrekin heriotzari buruz hitz egitea, ez dago gaia lantzen duen album ilustratu asko, ez eta ipuin ilustratu ere; are gutxiago euskaraz.

Jayde Perkin komikigile britaniarrak berak bizi izandako esperientzia batetik abiatuta idatzi zuen ipuin ilustratu hau. Nola aldatzen den mundua maite dugun norbaitek alde egiten duenean, zeinen zaila den aurrera egitea, zeinen galduta sentitzen garen… Eta, doluan zenbateko garrantzia hartzen duten objektuek eta oroitzapenek. Altxorrak bihurtzen dira!

Amatxoren jertsea ezinbesteko objektua da ama galdu duen ipuineko neskatilarentzat, han dago amaren usaina, han bere besarkada, haren artilezko harien artean ama dago. Izan ere, mina gainditzen al da? Erantzun doiena «ez» da, haurrarentzat ere bai. Baina, denboraren joanean hazi egiten gara, ikusi eta ikasi egiten dugu, jende berria ezagutzen dugu, eta, nahiz eta mina ez den desagertzen, inguratzen gaituen mundua handiagoa egiten da.

Galtzagorri elkartea (2021-05-10)

Heriotzaren gaia lantzen duten liburuen inguruan bideo kanala sortua du guraso.eus eko kolaboratzaile den Naroa Martinez Suarezek. Gai honen inguruko liburu gomendio ezberdinen inguruko bideoak pilatu ditu bere kanalean.

https://www.youtube.com/c/HeriotzaHaurrekin/videos