Azalpen bideoen proiektua da Ikusgela. Helburu didaktikoa duten bideoak lizentzia librean sortzen dituzte, euskarazko jakintza librea sortzeko eta jendarteratzeko. 

2022. urtean Ander Bolibar koordinatzailearekin izandako elkarrizketan aurkeztu genuen egitasmoa. Orain, literaturako klasikoen inguruko bideoak egiteari ekin dio ikusgelak eta Safo olerkigile greziarraren bideo batekin hasi dira. Filosofia, Ekonomia, Euskal literatura, Ingurumena, Erronka Digitalak eta Zortziko txikian sailetan banatutako bideoei gehituko zizkie hauek.

Irakasleentzako ez ezik etxerako ere interesgarri iruditzen zaizkigu ikusgelako bideoak, freskoak dira, ikastetxeetako kurrikulumarekin duten loturak seme alaben bide laguntzarako tresna moduan erabilgarri bihurtzen ditu eta geuk gai ezberdinen inguruan euskaraz ikasteko ere ederrak dira.

Itziar Orbegozok eta Imanol Epeldek aurkeztuko dituzte sorta honetako bideoak. Bakoitzak 7-10 minututan jasoko ditu autore eta obra baten gakoak. Bi astean behin aterako dira lehen sortako lauak: Safo, Dante, Homero eta Cervantes-en bideoak izango dira lehenak, baina udazkenean saioak jarraitu egingo du, eta beste lau bideo ere argitaratuko dira.