Azaroaren 30ean, Gautenak eta Gipuzkoako Kirol Egokituen Federazioak antolatutako ‘Jarduera fisikoa eta Autismo Espektroaren Nahasmendua (AEN)’ topaketa egin zen Hondarribiko kultur etxean.

Gautenak, Gipuzkoako Autismo Elkarteak, hainbat ekimenen artean, Autismo Espektroaren Nahasmendua duten pertsona guztiak kirola egitera gonbidatu nahi ditu.

Maialen Arrastia, Gautenako aisialdiko koordinatzailea

Garrantzitsua eta positiboa da jarduera fisikoa eta Autismoa nahastea?

Bai gainontzeko haurrentzat positiboa da eta AEN duen umeentzat askoz gehiago. Haurraren garapenerako psikomotorerako ekintza fisikoa oinarria da, ez oinarri bakarra baina bai oinarri oso garrantzitsua. Azken finean gorputzaren lanketa da, eta Autismoa duten haurretan gorputzaren lanketaren behar handia dago. 

Bestalde, alde emozionala lantzeko oso positiboa da. Normalean taldean egiten diren ekintzak dira eta bikainak dira harremanak izaten ikasteko.

Badago kirol zehatzen bat hobea dena AEN duten umeentzat?

Nik esango nuke denak positiboak direla, azkenean gorputza mugitzea oso positiboa da eta edozein kirolek balio dezake. Hala ere, nire ustetan, igeriketa kirol positiboenetako bat da. Izan ere, urak ematen dien sentsazioa sentzorialki brutala da eta askotan lotura hori sortzeko interesgarria da igeriketa.

Gurasoen artean ezagutzeko aukera bikaina ere?

Familientzat oso positiboa da. Guraso ezberdinak elkartzen dira eta beraien artean talde hori sortzea ikaragarri ona da. Haien esperientzia, kexka, aholku… elkarbanatu ditzakete eta elkarrengandik asko ikasi. Beraz, ariketa egokia iruditzen zait bai ume zein gurasoentzat.

Autismoa duten ume asko animatu dira?

Demanda asko dago, baina kontuan izan behar da ekonomikoki egin behar den inbertsioa. Inklusioa garrantzitsua da, eta beste haurren talde berdinean egotea ere bai, baina norbait jarri behar da haurraren jarraipena egiten eta hori ez da merkea. 

Hala ere edozein animatzen dut kirolaren munduan murgiltzera. Gipuzkoa mailan AEN duten jende pila bat dabil kirola egiten; patinatzen, igeriketan… Oso positiboa da eta mundu guztia animatzen dut!

Gautenaren inguruko informazio gehiago https://www.gautena.org/eu/ webgunean.