Gipuzkoako kostaldeaz eta bertako labarrez gozatzeko aukera emango dizuen plana da honakoa. Zarautzen dago Malla Harria kargalekua eta txango ederra familian egiteko.

Gure proposamena da herrigunetik abiatzea. Golf zelaia dagoen malekoiaren ertzean daude Malla Harria kargalekura eramaten duten eskailerak. Ez da nolanahiko igoera. Denbora gutxian maila asko igo behar dira, baina umeen adinaren arabera eta pazientziarekin hartuta helduko gara goraino. Bista zoragarriak daude goitik eta zeru urdinarekin zer esanik ez!

Eskailerak igotakoan aurrean dugun xenda jarraitu behar dugu. Ez dago galbiderik. Laster ikusiko dugu ezkerreko aldean eta begi bistan Malla Harria kargalekua. Beherantz doan bidea hartu beharko dugu bertara iristeko.

XIX. mendeko instalazioak dira, meategien ustiaketarekin lotutakoak. Asteasuko Andazarrateko meategietatik ateratako burdin-minerala ekartzen zuten Zarauzko paraje honetara itsasontzietan sartzeko.

Aireko tranbia linea batekin ekartzen zuten bertako biltegiraino, hamaika kilometroko ibilbidean. Jarraian, biltegitik zubi zamatzailera arteko bidea egin behar zen. Azalpenak emateko informazio panelak daude ikusgai.

Inguru ederra

Kargalekuari edota mineral ustiaketari buruz ikasi daitekeenaz aparte inguru ederra da honako hau. Neska-mutikoak gustura ibiliko dira gora eta behera egokituta dauden bidexka, senda eta pasareletatik. Kargalekuko pasabideak ere jolasgune polita dira, eta bagoneta zahar bat ere badago kargalekuan zer eta nola egiten zuten irudikatzeko.

Bistak, berriz, bikainak dira. Getariako arratoia ondo baino hobeto ikusten da zeru urdineko egunez eta baita ere Lapurdiko kostaldera arteko itsasertza, eguraldiaren arabera.

Espazio irekia da. Ez dago ez mahairik ez iturririk baina bazkaltzeko txoko bat aurkitzea ez da zaila izango.

Kargalekua ikusi ostean aukera dago bueltan herrigunera jaisteko zein bidean aurrera egin, eta goiko kanpinera zein ondoan dauden ostalaritza establezimenduetara heltzeko.

Oharra: Zarautzeko goiko kanpin ingurutik ere irits daiteke Malla Harria kargalekura. Hasierako eskailerak igotzea nahi ez bada hori izan daiteke beste aukera bat.