Maria Goikoak Batbirulau!, irakurzaletasuna bultzatzea helburu duen aplikazioa

Gipuzkoako Foru Aldundiak antolatzen duen Gipuzkoa APP’s 2015 lehiaketako lehenengo saria eskuratu berri du Galtzagorri elkartearen lehenengo app-ak.

Maria Goikoak Batbirulau! du izena eta Galtzagorri elkarteak Klis-klasikoak euskarazko liburu-bildumaren barruan argitaratutako Anjel Lertxundiren eta Antton Olariagaren izen bereko liburua du oinarri. “Liburuaren berezko izaera jostariari eutsiz, jolaserako proposamen berriak eta errealitate areagotuan birsortutako irudiak biltzen ditu Maria Goikoak batbirulau! app-ak: puzzleak, memoria-jokoak, hitz-jokoak, zazpi desberdintasunak bilatzeko jokoak, abestiak, 2.53D efektuko irudiak, eta bestelako hainbat joko”, azaldu dute Galtzagorritik.

Androidetarako eta iphone/ipad-etarako bertsioan doan eskura daiteke bakoitzari dagokion saltoki birtualean. Horrez gain, Galtzagorriren web gunera sartuta ere erabilgarri dago aplikazioa.

4-10 urte bitarteko haurrentzat

4 eta 10 urte bitarteko haurrentzat egindako app-a da, baina bakarka, lagunartean nahiz familian jolasteko aproposa da. Jolas gehienek, gainera, zailtasun maila desberdinak eskaintzen dituzte. “Liburua aldean izatea ere komeni da, zenbait jolasetarako ezinbesteko osagarria baita”, azaldu du Galtzagorritik.

Lehen saria Gipuzkoa APP’s 2015 lehiaketan

Galtzagorri elkarteko kideak pozik azaldu dira aplikazioak jaso berri duen sariarekin. Epaimahaikideen iritziz, Maria Goikoak Batbirulau! “oso ondo egindako app-a da, oso erabilgarria eta berritzailea”.

Hurrengo erronka Klis-klasikoak app-bilduma osatzea izango dela adierazi dute Galtzagorritik.