Martxan da gazteek indarkeria matxistaren aurrean duten jarrera erakustea helburu duen Beldur Barik lehiaketa. Ikus-entzunezkoen lehiaketa da eta 16. aldia izango du aurten. Beldur Barik jarrera bultzatzea du helburu eta gazteen artean indarkeria matxista saihesteko eta haiekin batera hausnarketa eta eztabaidak sustatzea.

POV bideo laburrak ere bai

Gazteek hainbeste erabiltzen dituzten sare sozialak modu kontziente eta feminista batean baliatzeko hausnarketa ere suposatuko du, aurten, Beldur Barik lehiaketak. Hain zuzen ere, hori da 2025eko lehiaketaren berrikuntzetako bat: sare sozialetan hain zabaldua dagoen POV erako bideo laburrak ere aurkeztu daitezkeela. Helburua da lehiaketa egokitzea gazteek sareetara igo ohi dituzten bideo formatuetara.

Emakundek sustatzen du lehiaketa Arabako, Bizkaiko eta Gipuzkoako Aldundiekin zein Euskadiko Udalen Elkartea den EUDELekin batera. Hain zuzen ere, Emakundeko zuzendari Miren Elgarrestak esan du helburua dela gazteen artean indarkeria matxista prebenitzea: “Nesken ahalduntzea lagunduz eta mutilei berdintasunaren beharraren inguruan hausnartzen lagunduz, denen parte hartzearekin gizarte berdinzaleago baten alde eginez”.

Lehiaketaren xehetasunak

Lehiaketan 12 eta 20 urte bitarteko gazteek har dezakete parte, banaka edo taldeka, bi kategoriatan banatuta:

  • 12-16 urte (2013-2009 artean jaiotakoak)
  • 17-20 urte (2008-2005 artean jaiotakoak)

Parte hartzea zabalik azaroaren 9ra bitarte eta izen-ematea webgunearen bidez egin behar da

Aurkeztutako ikus-entzunezkoek gazteen jarrera kritiko, eraikitzaile eta konprometitua islatu behar dute indarkeria matxistaren aurrean. Hau da, Beldur Barik Jarrera adierazi behar dute: parekidetasuna, askatasuna eta autonomia, elkarkidetza eta indarkeria matxistaren bazterketa irmoa adierazten dituzten jarrerekin. Gazteek ikastetxe, gazteleku, aisialdi talde, elkarte edota emakumeen etxeen bitartez ere aurkeztu ahal dituzte lanak. Lehiaketaren oinarriak programako webgunean kontsulta daitezke.

200 eta 650 euro arteko sariak

200 eta 650 euro arteko sariak banatuko ditu aurten Beldur Barik lehiaketak, tartean publikoaren saria –300 euro– eta ikus-entzunezko lan onenaren saria –300 euro–. Lan sarituak azaroaren 28an egingo den Beldur Barik Topaketan emango dira ezagutzera.