Martxan da Beldur Barik lehiaketaren hamabosgarren aldia, “gazteen artean indarkeria matxista prebenitzeko” helburuarekin. Horretarako, antolatzaileek 12 eta 20 urte arteko gazteak gonbidatu nahi dituzte “indarkeria matxistaren aurrean berdintasunarekiko konpromisoa” agertzera, gehienez ere hiru minutuko ikus-entzunezko bat eginda: “Beldur Barik jarrera irudikatu nahi da, neskek eta mutilek desberdintasun-egoerei aurre egiteko dituzten moduak definitzen dituena eta errespetuan, askatasunean, autonomian eta erantzunkidetasunean oinarritutako harremanak eraikitzen dituena”.

Emakundek antolatutako lehiaketa bat da, eta Arabako, Bizkaiko eta Gipuzkoako aldundiak ditu bidelagun; baita Eudel ere, Euskadiko Udalen Elkartea.

Parte-hartzeko baldintzak

Banakako edo taldekako lanak aurkez daitezke, eta hiru kategoriatan egongo dira banatuta, adinaren arabera: 12-14 urte artekoak, 15-17 eta 18-20. Lan irabazle eta aipamen berezi bakoitzeko, berriz, bi lan sarituko dira kategoria bakoitzean, 400 eta 200 eurorekin, hurrenez hurren. Horrez gain, 300 euroko bi sari ere izango dira lan onenarentzat eta bideo bozkatuenarentzat.

Kalean da abestia

Lehiaketaren edizio honetarako propio sortu dute Beldur Barik abestia, hainbat artistak elkarlanean: Garazi Zabaleta Mendizabalek konposatu eta ekoiztu du, eta Victor Sanchezek (Elkar Estudioa) egin du nahasketa eta mastering-a. Abeslariak, berriz, Leire Olariaga (Ithaka), Ane Agirre (Biren) eta Africa (Miss Afrika Bibang) izan dira.