Hiru adituren iritziak jaso ditu Argia astekarian Onintza Iruretak.
“Gurasoak aztoratuta dabiltza, neska-mutikoak Haur Hezkuntzan hirugarren hizkuntza ezagutzen hasi dira, eta guti delakoan akademiara daramatzate”, dio artikuluan Iruretak. “Urtebeteko haurrak akademiara eramateko iragarkiak entzuten ari gara”. Eta guraso askok gure buruari egin diogun galdera botatzen du: Merezi al du 4 urterekin ingelesa ikasten hastea?
Hiru aditurengana jo du erantzunaren bila: EHUn Hezkuntza Zientzietan katedraduna den Jasone Cenoz, Gasteizko Irakasleen Unibertsitate Eskolan Hizkuntzaren Didaktika irakaslea den Uri Ruiz Bikandi, eta Donostiako Irakasleen Unibertsitate Eskolako irakaslea den Itziar Elorza.
8 urterekin baina intentsiboagoa (Jasone Cenoz)
Cenozek ikerketa bat buru zuen eta hauxe dio: “Hobekuntza pixka bat nabaritu dugu, baina pixka bat, nahiko mugatua da ikasten dena (…) Alegia, ez dago pentsatzerik lau urterekin hasten direlako goi mailako hiztun bihurtuko direnik”. Azaltzen du ingelesa atzerriko hizkuntza dela gurean eta eskolan bi orduz baino ez dela ematen. Hobekuntzaren bat aurkitzekotan entzumena eta hitz egiteko lasaitasuna aipatu ditu Cenozek, jakinda ez dagoela inolako ikerketatan frogatuta. “Agian 8 urterekin hasi eta intentsiboagoa eginda hobeto litzateke, agian bai, baina ez dago frogatuta”, dio. Argi utzi du, bestalde, astean bi orduz aritzeak haurrei kalterik ez diela sortzen.
Ez du merezi (Uri Ruiz Bikandi)
Haren ustez, ez du merezi 4 urterekin hastea, ingelesa tantaka ikastea eta gainera, alferrikako gastua dela iruditzen zaio. “Badirudi ahoskeran eta sintaxian baduela abantaila umeak, baina hizkuntza oso kantitate handitan jasotzen duenean”, azaltzen du.
CLIL irakats ereduari buruz ere mintzo da Ruiz Bikandi. Eredu horrek egiten duena da atzerriko hizkuntza ikasteko orduak gehitu beharrean, ikasgaiak irakasten dira hizkuntza horretan. Eta arazo bat ikusten dio CLIL ereduari: “Ikasleek hizkuntza ez badute menderatzen ezin dute ikasgaia menderatu”.
Noiz baino nola hasten zaren da kontua (Itziar Elorza)
Ikastolen Elkarteak martxan duen Eleanitz proiektuaren inguruko tesia egin zuen. Proiektu horrek lau hizkuntza kudeatzen ditu (euskara, gaztelania, ingelesa eta frantsesa). Ikastola batzuk 4 urterekin hasi ziren eskolak ematen eta beste batzuk 8rekin. Bi taldeak konparatu zituzten ikerketa horretan hamabi urtez, eta ondorio honetara iritsi ziren: 4 urterekin hasitakoek ingelesean maila hobea zuten Derrigorrezko Bigarren hezkuntza amaieran. Baina zein zen arrazoia; 4 urterekin ikasten hasi izana? Zalantzak ditu Elorzak eta beste faktore batzuk ere eragin dutela uste du. “Lanketa ikaragarriak ahalbidetu du talde esperimentalak beste taldeak baino emaitza hobeak izatea”, dio. Onartzen du onurak eman daitezkeela komunikazio gaitasunean zein ingelesarekiko sentipen egokiagoan, baina dio: “Geroago hasi eta diru baliabide berberak jarriko balira, eta beste era batera egingo balitz, adibidez ikastalde txikiagoetan edo gela berean bi irakasle sartuta…”. Elorzaren iritziz, kontua ez da noiz hasten zaren ingelesa ikasten baizik eta nola egiten duzun.
Artikulua osorik eta argazkiaren iturria hemen.