“Nire lehen haurraz erietxe publiko batean erditu nintzen. Izango zen presagatik, baliabide eskasiagatik, egiturazko indarkeria delako… Egon nahi ez nuen interbentzioetan ikusi nuen nire burua une batetik bestera. Indukzio bat egin zidaten, ezezkoa esan nien arren. Azkenean, zesarea egin zidaten, mediku ikuspegitik beharrik egon ez arren. Mehatxu egin zidaten, horretara behartu. “Erietxera bazatoz guk esaten duguna egin behar duzu”, esan zidaten. Trauma osteko estresa eragin zidan horrek, eta oso urte txarrak pasa nituen. Psikologikoki oso jota nengoen.

Lehen salaketa jartzeko urte bateko epea dago soilik. Gertatu zitzaidanari hitzak jarri orduko, kemena batu eta salaketa jarri nuen. Egin zidatena aitor zezaten nahi nuen. “Zuk horrela bizi izan baduzu, zerbait gaizki egin dugu”, horixe entzun nahi nuen, besterik ez.

Nahia Alkorta Elezgaraik “Mi parto Robado” liburua idatzi zuen 2023an bere erditzearen esperientziatik abiatu eta epaiketaren ibilbidea kontatzeraino. Indarkeria obstetrikoa aitortu zaion lehen emakumeetako bat da munduan. Liburua Martxoaren 21ean aurkeztu zuen Bergarako Kartzela Zaharrean eta Txapa Irrati libreak zuzenean bota zuen irratsaio formatuan. Gaur, egun hartako grabazioa ekarri dugu guraso.eus egitasmora.