Gasteizko Santa Luzia auzoan kokatuta dagoen Angel Ganivet ikastetxean, jolastokia eraldatzeko proiektua abiatu dute. Irakasleak, ikasleak eta gurasoak buru-belarri ari dira lanean, eta Miren Zumarraga gurasoak eman digu egitasmoaren berri.

Nolatan erabaki zenuten jolastokia eraberritzea?

Eskolak lan handia egiten du hezkidetzaren eta bizikidetzaren alde, eta berdintasun batzorde bat eratu genuen (irakasleen, ikasleen eta gurasoen partaidetzarekin). Gure helburu garrantzitsuenetarikoa jolastokia eraldatzea  zen, eta horrela,  2018-2019 ikasturtean, prozesuari ekitea erabaki genuen.

Aurreko urtean 40 urte bete zituen eskolak eta patioa erabat zaharkitua zegoen. Gainera, futbol zelaiak hartzen zuen eremuaren %80a, eta dena asfaltoz beteta zegoen; ez zegoen zaburik ere. Finean, ikusi genuen banaketa eta diseinua ez zetozela bat egungo beharrekin. Askotan generoak karga handia du; horren adibide da neskak baztertuta geratzen zirela patioko izkina baten. Eta txikienak ere, jolasterako orduan, azkenak izaten ziren zelaia aukeratzen.  Hori guztia aldatzeko lanean hasi ginen. Jolastoki inklusiboago baten bila, elementu naturalekin eta jolasteko, atsedenerako eta sozializaziorako elementu berriekin espazioa eraldatzea erabaki genuen.

Jolas-eremu berriak zein helburu bete behar ditu?

Ikasleen ongizatea eta bizi-kalitatea hobetzea da helburua, eta baita bizikidetza eta aniztasunarekiko errespetua sustatzea ere. Horrez gain, jarduera fisikoa bultzatzea, komunitatearen harremanak estutzea edo natura zaintzea ere badaude gure xedeen artean.

Gurasoen inplikazioa oso handia da proiektuan…

Guretzako hori izan da garrantzitsuena; gu izan gara motorra prozesua mugitzerako orduan. Egia esan, irakasleak beste zeregin batzuk dituzte, eta orain oso lanpetuta daude COVID-19aren gaiarekin. Baina esan behar da lan handia egin dutela lehenengo fasean: hainbat dinamikaren bitartez, ikasleekin ebaluazio bat egin dute haien beharrak eta nahiak zeintzuk diren identifikatzeko.

Honen aurretik ere egin dituzue horrelakoak Ganiveteko gurasoek?

Ez, baina hainbat batzorde ditugu. Nolanahi ere, proiektu honek indar handia eman digu familiei, eta pozik gaude lortu dugun inplikazioarekin. Denona sentitu dugu hau, eta auzolanetan ikusi da hori. Komunitate sentimendua loratu da.

Jolastokia eraberritzeak, orduan, beste onura batzuk ere ekarri ditu…

Bai. Alde batetik, jolastokia bera fisikoki eraldatzeak harrera oso ona izan du: haurrak pozik daude, eta gu ere bai, jakina. Eta bestetik, familien inplikazioa ere lortu dugu. Azken finean, eskolaren parte gara denok –ez bakarrik irakasleak eta ikasleak–. Familiek asko egin dezakete. Jolastokia eskolako espazio oso garrantzitsua da umeen garapenerako; bai jolaserako, bai sozializaziorako eta baita familien arteko harremanak sendotzeko ere.

Esperientzia polita izaten ari da, hortaz?

Bai, zalantzarik gabe. Orain baratza bukatzen ari gara eta hurrengo pausua futbol zelaietako baten ateak kendu eta mural erraldoia marraztea izango da. Horretarako ere familia askoren lana beharko da. Oso pozik gaude, asko dugu egiteko eta esateko, eta elkarlana oso aberasgarria izaten ari da.

Halako prozesu bat abiatzeko ezagutzak ere beharrezkoak izango dira…

Bai. Egia esan, guraso-talde heterogeneoa gara: batzuk baratzean adituak, beste batzuk eskulanetan trebeak… Eta lau arkitekto ere badaude taldean.  Oso argi azaldu ziguten zein zen jarraitu beharreko bidea: etapaz etapa, gauza txikiak egitea. Horrela lortzen da eraginkorrak izatea.

Eta alderdi ekonomikoari nola egin diozue aurre?

Baratza egiteko, Gasteizko Udaleko Ingurugiro Gaietarako Ikastegiak emandako dirulaguntza dugu. Eta bestetik, Jaurlaritzak mugikortasuna sustatzeko duen programara aurkeztu gara eta dirulaguntza eman digute.

Eta bukatzeko, beste ekimen bat ere abiatu duzue, ezta?

Gasteizko zenbait guraso elkartek plataforma bat sortu dugu eskola-inguru seguru, osasuntsu eta hezkidetzaileen inguruan elkarrekin lan egiteko. Hurrengo astean aurkeztuko dugu gure ekimena.

Etiketak: