MUNDU BERRI BAT GUZTIONTZAT 3. egitasmoa aurkeztu zuten larunbatean Bizipoza elkarteko lagunek Hernaniko Biteri aretoan. 11 elkarteren bideoak primizian ikusteko aukera izan genuen bertaratu ginenok.

Egitasmoaren aurkezpenaz haratago Bizipozaren sarearen baitan elkartzen diren elkarte, eragile eta familien lana nabarmentzeko balio izan zuen beste behin ekitaldiak.


Bizipozak, ikusgarritasuna, ahotsa eta presentzia eman die elkarte hauei azken urteetan eta larunbatean aurkeztutako egitasmo hau adibide bat besterik ez da. Urteak daramatzagu guraso.eus egitasmoan Bizipoza elkarteari esker, lehen ezagutzen ez genituen errealitateak ezagutzen, familia eta guraso askoren behar eta ilusioen berri izaten eta egiten den lanari aurpegia jartzen.

Joxe Mari Agirretxe eta Amaia Elizondo, Bizipoza elkarteko talde eragileko kideak izan ziren ekitaldia aurkeztu eta bideratu zutenak, humorea ez zen falta izan ez eta eskertza eta egindako lana balioan jartzea ere; elkarteen helburuak, egitasmoaren ekoizpenaren nondik norakoak, elkarteen eta euskal sortzaileen arteko elkarlana…


Agipase, Juneren Hegoak , Dravet elkartea, Ume Alaia, Nuala, Arnasa, Naizen, Marea urdina, Iñurri, Pausoka eta Ndank Ndank elkarteetako bideoak ikusi ahal izan genituen. Bideoklipen tartean baina, Xabier Sukiaren bertsoa, Kai Nakaik Naizen elkarteko lagunekin egindako abestia zuzenean ikusteko aukera, babesleen hitzak edo bizipozako talde eragileko lagunen hausnarketak ere tartekatu ziren … mimoz prestatutako ekitaldia Euskal Herrian elkarte ezberdinetan egiten den lan ikaragarriari gorazarre egiteko.

Bizipozako elkarte bakoitzak euskal sortzaileekin elkarlanean sortutako kantu eta bideoklip guztiak ikusi ahal izango dira beraien webgunean. Astero joango dira bideo berri bat publiko eginez eta jada bi elkarteen bideok dauzkagu ikusgai. Agipase eta Ndank-NdanK elkarteenak ain zuzen ere.