EAEko DBHko 3. eta 4. mailetako eta Batxilergoko ikasleei zuzenduriko ekimena aurkeztu du Jaurlaritzako Hezkuntza Sailak. Azaldu dutenez, gazteen artean euskal kantagintza ezagutaraztea da asmoa, besteak beste.

Martxoan hasi eta ekainera bitartean 30 musikarik 92 saio egingo dituzte Euskal Autonomia Erkidegoko eskola eta institutuetan; euren lana erakutsiko diete DBH-ko 3. eta 4. mailetako eta Batxilergoko ikasleei.

Musikariek gazteekin hitz egiteko tartea hartuko dute, eta euren sortze prozesuez eta ibilbideez jardungo dute. Gainera, ikasgelan bertan ere abesti batzuk eskainiko dituztela aurreratu dute.

Honako hauek dira programan parte hartuko duten artistak: Aguxtin Alkhat, Aneguria, Birkite Alonso (Birkit), Elena Caballero, (La Basu), Eñaut Elorrieta, Erik Berganza, (Abereh), Estitxu Pinatxo, Iban Urizar, (Amorante), Iker Lauroba, Ines Osinaga, Jon Basaguren, Jon Gurrutxaga, Joseba Irazoki, Jurgi Ekiza, Keu Agirretxea, Maite Larburu, Maria Rivero, Mikel Inuntziaga, (Inun), Mikel Markez, Mikel Urdangarin, Miren Narbaiza, Olatz Salvador, Pantxix Bidart, Paxkal Irigoyen, Rafa Rueda, Thierry Biscary, Tristtan Mourguy, Unai Unda, Xatiro, Xabi San Sebastian eta Zuriñe Hidalgo.

Kantu-saioez, harago

Hezkuntza Sailak azaldu duenez, programaren helburua ez da soilik musikarien abestiak entzutea, “formazioa eta transmisioa” ere kontuan hartu nahi dituzte: “Sortzaileek, euren esperientzia eta lana aurkeztuko diete ikasleei, baina euskal kantagintzaren baitan kokatuko dute bere esperientzia. Era honetan, ikasleek adibide partikular bat ezagutzeaz gain, ezagutza global bat ere jasoko dute azken hamarkadatako euskal kantagintzaz”.

Horretarako, baina, ikasleek gaiaren inguruko lanketa egingo dute aurretik,  Begoña Pedrosa Hezkuntza sailburuordeak azaldu duenaren arabera.  “Ikasleek entzun eta ikusiko dutenaren gainean ezagutza oinarrizko bat izan dezaten, irakasle eta eskolen eskura jarriko dira hainbat material eta elementu”, zehaztu du Pedrosak. Besteak beste, honako hauek izango dira gazteek landuko dituztenak: euskal kantagintza berriaren sorrera, euskal rock-and-rolla, folkaren loraldia, Rock Radical Vasco, trikitiaren baserritik kalerako jauzia, 90eko hamarkadako oparotasuna, edo XXI. mendeko kantagintza, besteak beste.

Etiketak: