Galdera honi erantzun dio Berriako eztabaida gelan Beatriz Eceiza Urdangarin Laskorain ikastolako Orientzailea eta Lehen Hezkuntzako zuzendariordeak

Bullying-a da haur edo nerabe bat biktima bihurtzen denean beste haur edo nerabe batzuek gauzatutako ekintza negatiboak pairatuz, behin eta berriro eta denbora jakin batean zehar (Olweus, 1998).

Horrelakoetan jazarpena mota hauetakoa izan daiteke: fisikoa, psikologikoa, hitzezko jazarpena, gizarte-jazarpena.

Gure ikastolan, berdinen arteko erasoak edo beste edozein gatazka mota saihestu edo ondo bideratu daitezen prebentzioak sekulako garrantzia du; horretarako, Haur Hezkuntzatik hasi eta Batxilergora bitarte Bizikidetza plan sendo eta trinko bat ezarrita daukagu.

Bizikidetza plan hau eraginkorra izan dadin, haur eta nerabeen garapena hartzen dugu kontuan bere osotasunean, lanketa sekuenzializatu eta progresibo batekin, horretarako Adimen Emozionalari indar berezia emanez. Haurra eta nerabea indartzea da plan honen helburu nagusia, haurrak baliabideak gara ditzan eta egunerokotasunean ematen den edozein egoerari, baita bortitzei ere, aurre egin ahal izan diezaion. Hona hemen, nola dugun antolatua prebentzio-plana etapa desberdinetan:

HHn (3-6 urte) haurraren autoezagutza indartzen dugu. Bestetik, egoera ezberdinen aurrean emozioak identifikatu, horiei izena jarri eta emozio hori sentitzearen zergatia ulertu. Hori guztia, irakasleak gelan egunerokotasunean eta modu naturalean txertatzen du.

LHn, autoezagutza, erregulazio, autoestimua, enpatia, komunikazio asertiboa ez bortitza, gatazken konponketa… Finean, haurren arteko harreman osasuntsuei ematen diegu bereziki garrantzia.

Hauek guztiak eguneroko errealitatean txertatu ahal izateko, proiektu berri bat jarri dugu martxan, aurtengo ikasturtean: Ikasle laguntzailea.

Tutoritza-saio berezi batzuen bitartez, elkarrenganako lagun-premiari buruzko sentsibilizazio-saio batzuk jaso dituzte haurrek; helburua, gatazka bat suertatzen denean edo haur batek beste bat iraindu, baztertu, mehatxatu egiten duenean, ikasle talde bat dago, momentuan interbentzioa egiten duena. Honako emaitza hauek antzematen ari gara: autonomiaz eta ziurtasunez jokatzen hasi dira ikasleak, parte-hartzaile zuzen sentitzen dira, laguntza ematea bere ongizatean eragina izaten ari da eta ikasle ahulenak ere babestuak sentitzen dira. Bestetik, erasotzaile izan daitezkeenak laguntzaile bihurtzen ditugu, modu horretan, ahularekiko enpatiarako lehen hastapenak garatzen dituzte. Azkenik, bullying kasuetan «ikusle pasibo» jarrera duten horiek, aktibo izateko jarrerara bideratzen ditugu. Proiektu honek D.B.H4.mailara arte izango du jarraipena.

LHko 3. zikloa eta DBH 1. maila (10-13 urte), haurrak kontzientzia gehiago duenez eta identitatearen rolaren definizioa garatzen duenez, Bullying-a gertatzeko arriskua handitu egiten da. Hori dela eta, bullying-aren inguruko lanketa esplizitoa egiten da.

DBH eta Batxilergoan asteroko programazioaz gain, saio bereziak egiten ditugu. Ez ikusiarena ez egin! Betaurrekoak jantzi eta ekin!! lelopean.

Azkenik, ezinbestekotzat jotzen dugu, edozein kasu antzematean, interbentzio azkarra, albait azkarren, abian jartzea.