Gaur egin dute jardunaldiaren aurkezpena Errenteriako Lekuona Kultur fabrikan. Uztailaren 1erako iragarri dute topaketa, eta zabalik da izen-ematea. Ekitaldi berean herri hezitzaileen sarearekin bat egin du Errenteriako Udalak. Hitzarmena sinatuta sareko kidea da herri gipuzkoarra ere.

Herri bat hezkuntzatik eraikitzen jardunaldiarekin egun osoko gogoeta proposatzen dute Oinherri egitasmoko kideek. Euskal Herriko 25 bat udalek eta 16 eragilek osatzen dute Oinherri sarea, eta hezkuntzaren inguruko gogoetak partekatuko dituzte Errenteriako saioan. Horretan laguntzeko hezkuntza komunitateko hainbat eragile elkartu dituzten bertan.

Hezkuntza ardatz herri bat eraikitzeko

“Herri bat eraikitzerako orduan ezinbesteko ardatza da hezkuntza. Gure kasuan, are gehiago esatera ausartuko ginateke, gureak ez diren hezkuntza sistemak baitauzkagu. Hori horrela, Oinherri herri hezitzaileak sustatzeko elkartetik gure ekarpentxoa egin nahiko genuke gai honetan. Herri hezitzaileen egitasmoak hezkuntza modu integralago batean ulertzeko eta, herriko hezkuntza komunitateak saretzeko aukera erreala eskaintzen dituelako”, azaldu dute antolatzaileek. “Oinherrin argi daukagu hezkuntzaren eskumenek deszentralizazio prozesu bat behar dutela. Eta Udalek gai honetan protagonismo handiagoa hartzen joan beharko luketela, tokian tokiko herri hezitzaileak sustatzeko, auzolanean behetik gorako eraikuntza prozesu anitz eta zabalak sustatzeko”.

Durango egin zuen iaz jardunaldia Oinherrik. Sarea osatzen duten herri hezitzaileen erronkak jaso zituzten orduan. Aurten, asmoa da erronka horietan aurrera pausoak emateko bide berriak urratzea. Zabalik da izen-ematea.

Egitaraua

  • 9:30-10:00, harrera.
  • 10:00-10:30, Nora Salbotxek Hik Hasik 2017an plazaratutako hezkuntza proposamenak eta (H)arian prozesuak emandakoen arteko gakoak azalduko ditu.
  • 10:30-11:30, Itziar Ostolaza Galdosek Errenterian azken urteetan hezkuntza komunitatearekin burututako lanketa aurkeztuko du.
  • 11:30-12:00, atsedenealdia.
  • 12:00-13:00, Elisabet Franquea I Rocak eta Gl√≥ria Cunill Vilaltak hezkuntza eskumena deszentralizatzeko beharraren inguruan arituko dira. Kataluniako VIC herrian egindako prozesua azalduko dute.
  • 13:00-13:30, galderentzako tartea.
  • 11:30-15:30, bazkaltzeko tartea.
  • 15:30-17:30, mahai-ingurua zehazteko dauden parte-hartzaileekin. Izenburua: ertz ezberdinetatik eragin eta eraiki.