Gau Beltzari edo Arimen Gauari buruz gehiago ikasteko online ikastaroa antolatu dute Euskaltzaleen Topaguneak, Ekoguneak eta UEUk; izan ere, azaldu dute “globalizazioaren ufadaz” Halloween delako ospakizuna zabaltzen ari dela Euskal Herrian, eta hemen ere gaur horren bueltako errituak egin izan direla aspalditik.

Hainbat formatzailek erakutsi nahi dute Domu Santu egunaren bueltan askotariko errituak egin direla Europa osoan, eta baita Euskal Herrian ere, eta horren inguruan sakontzeko izango da ikastaroa. “Haur eta gaztetxoentzat, bereziki, erakargarritasun handia duten ospakizunak dira”, gaineratu dute. Irailaren 16an bukatuko da izena emateko epea.

Gau Beltza Domu Santu bezperan, urriak 31, ospatzen den gaua izan da Euskal Herrian, eta azaldu dutenez, hemen ere, kalabazak edo arbiak hustu, aurpegi itxura eman eta bide bazterretan argiztatuta ipintzen ziren.

Baliabideak trukatzeko ikastaroa

Ikastaroak oinarri izango du Altuna eta Ozaitaren Itzalitako kalabazen berpiztea izeneko lan etnografikoa. Esan bezala, online izango da eta 20 ordu izango ditu; irailaren 23tik urriaren 10era bitartean eskainiko da.

Topaguneko kideek azaldu dutenez, ospakizuna herrietan antolatu nahi dutenetzat baliabideak sortu eta eskuragarri jartzea da helburua; Herri eta auzoetan Gau Beltzak antolatzeko “oinarri teorikoak eta antolakuntzazkoak eskaintzea”, hain zuzen ere. Horrez gain, orain arte egindakoak partekatzea ere nahi dute, baliabideak eta esperientziak ezagutzeko.

Formatzaileei dagokienez, bost adituk emango dituzte saioak: Jaime Altuna eta Josu Ozaita gizarte antropologoek, Johana Olabarria animatzaile soziokulturalak, Itsaso Olaizola Ekoguneko proeiktu kudeatzaileak eta Aitziber OnaindiaTopaguneko komunikazio lan-taldeko kideak.

Matrikulatzeko aukera, bihar, hilak 16, bukatzen da.