Ordubete aurreratu ditugu gure ordulariak udaberriko ordutegiari hasiera emateko.

image

Ordu aldaketak gizakiaren eta umeen portaeran eta behar fisiologikoetan eragina du. 60 minutuko aldaketa besterik ez ian arren, gizakiaren burmuinean sortzen diren hormona asko hankaz gora jartzen dira, eta aldaketa txiki horrek dezente handiagoak sortzen ditu.
Ikerlariak ordu aldaketak gizakiaren organismoan izan ditzakeen eraginak neurtzen ari dira, eta gaiak eztabaida sortzen du gizartean.

Eragina burmuinean

Nahiz eta argiaren aldaketa txikia izan, burmuinean eragin zuzena du, erretinak argi aldaketa nabaritzen duelako eta hipotalamoari informazioa bidaltzen dio. Honela, burmuinaren zati horretan sortzen diren hormonen maila aldatu egiten da.

Aldaketak, gehienbat, bio-erritmoetan du eragina, eta umeena da eragin handiena sumatzen duen kolektiboetako bat. Udaberriko ordu aldaketan ordubete kentzen diogu gauari, beraz, ohikoa da umeek logura, gorputzaldi txarra edo suminkortasuna azaltzea. Horrekin lotuta daude umore txarra edo gose falta.

Umeen organismoak pare bat egun beharko ditu aldaketara egokitzeko, eta zenbait kasutan astebete ere bai. Adinean aurrera egin ahala txikitzen joango dira egokitzapen arazok horiek. Ondorio horien eragina gutxitzeko zenbait adituk gomendatzen dute 60 minutuko aldaketa bat batean egin beharrean astebeteko epean egitea. Egunean, esaterako, eguneroko ekintzak 15 minutuz aurreratuz: esnatzeko ordua, gosaria, bazkaria, afaria…

Egunetik egunera gertatzen dira argiaren aldaketak, baina poliki-poliki aldatuz ez dute eraginik gizakian, erritmo zirkadiano delakoaren barnean sartzen dira-eta. Aldaketa bat-batekoa izateak dakar arazoa. Ikerketek erakutsi dute umeek euren portaeran aldaketak jasan ditzaketela eta arreta maila txikitu; nagusietan, berriz, loaren nahasmenduak ager daitezke.

Gizakia lo dagoen bitartean ere argiak eragina du bere organismoan. Lo egiteko iluntasuna behar da. Eguzki izpiak betazaletatik pasatzen direnean gorputza berotzen hasten da, eta pixkanaka organo guztiak suspertzen hasten dira.

Ordua aldatzen 1.974tik

Ordu aldaketa 1974tik aurrera orokortzen hasi zen, petrolioaren krisiarekin batera. Herrialde batzuek eguzkiaren argia hobeto aprobetxatzeko eta elektrizitate gutxiago kontsumitzeko ordulariak aldatzea erabaki zuten. 2001etik Europar Batasun osoan, derrigorrez, urriaren azken asteburuan neguko ordutegira pasatzen gara.

Albistearen iturria hemen eta hemen.

Argazkiaren iturria hemen.