Hastear den ikasturterako iragarri du neurri berria Hezkuntza Sailak. Irailetik aurrera gaitasun handiko ikasleak identifikatzeko protokoloa lehen eta bigarren hezkuntzako ikastetxe guztietan burutuko da. Hain zuzen ere LH 1, LH 2, LH 6, DBH 1 eta DBH 2 mailetan burutuko da.

Neurri hori jasota dago Hezkuntza Sailak joan den ekainean ikastetxeei eta institutuei igorri zien 2023-2024 Ikasturte Hasierako Ebazpenean. Hala, ikastetxe guztiek aplikatu beharko dute gaitasun handiko ikasleak identifikatzeko eta haiei hezkuntza-erantzuna emateko protokoloa. Orain arte, esku-hartze hori ikastetxe bakoitzaren borondatearen araberakoa zen.

Euskal Autonomia Erkidegoko Gaitasun Handiko Haurren elkartean, Aupatuz elkartean, modu positiboan baloratu dute neurria uste baitute gaitasun handietarako esku-hartzearen sistematizazioa premia bat dela. Hala ere, irakasleen prestakuntza eta sentsibilizazio handiagoaren falta sumatzen dute, bai kasuak detektatzeko, bai hezkuntza-errealitate konplexu baterako esku-hartze egokia eskaintzeko.

Era berean, Aupatuz elkartean interes handiz itxaroten dituzte Hezkuntza Sailak aurreko ikasturteko azken bi hiruhilekoetan Lehen Hezkuntzako hainbat ikastetxetako 1. eta 6. mailetan egindako esperientzia pilotuaren ondorioak. Hastear den ikasturte hasieran emango dituzte jakitera.

Argazkiaren iturria hemen.

Lotura duen albistea. Amaia Agiriano: “Adimen gaitasun handia garaiz identifikatzea garrantzitsua da gero esku-hartze egoki bat egiteko”