Urtarrilean Txunpa txun kantuarekin egin zuten bezala, oraingoan Pilota berria abestiaren ikus-entzunezkoa argitaratu dute Potx eta Lotxek, aurrerapen abesti bezala. Laster aurkeztuko duten Kaleak bizirik izeneko diskoan izango da entzungai.

Oñatiko Torrekua baserriaren kanpoaldean egin dute bideoklip berriaren grabazioa, Potx eta Lotx pailazoek. Txinparta Bertso Eskolako gazteekin egin zuten Pilota berria kantuaren grabazioa, izan ere, bertan agertzen diren gaztetxo horiek ere idatzi dute disko berrian argitaratuko duten kantuetako bat.

Zehazki, Pilota berria kantuaren letra, Txinparta Bertso Eskolako Iñaki Olalderena da. Hitzekin jolas egiten duen kantu bat da. Erakusten baitu hitz bakar baten adierekin nola egin daitekeen abesti dibertigarri bat. Hau da errepika, begira zer egiten duen errima hitzekin: “Entzun nahi al duzue daukagun berria?, Esku artean dugu pilota berria, txerritxoko diruaz erosi berria.”

Musika Josu Zubiarena da eta bideoklipa Oier Yanizek zuzendu eta grabatu du, Oihan Loitiren laguntzarekin.