Baltzola Dimako auzo bat da eta auzotik hurbil daude Baltzolako kobazuloak. Bi koba handi dira, baina haien barruan hainbat eta hainbat kobazulo txikiago daude. Mitologiaren arabera, bi kobazulo hauetan bizi zen Sugoi. Beste batzuen arabera, Mikelats zen kobazulo hauetan bizi zena.

Horrez gain, Abaro izeneko tunel naturala dago. Tunel honetatik erreka pasatzen da ur emari handia duen egunetan. Axlor aztarnategia ere hemendik hurbil dago. Gaur egun, hesi batek ixten du aztarnategia.

Azkenik, Jentilzubi izeneko zubi naturala ere Baltzolako kobazuloen inguruan dago.

Hala, Baltzolatik mendi ibilaldi interesgarriak egin daitezke.

Kobetara heltzeko Dima herria atzean utzi eta Otxandio aldera hartuko dugu BI-2543 errepidetik. Indusi auzotik Baltzolamendi norabidean joan behar gara. Ondo seinaleztatutako bidea da eta bertatik kobaren ahoa ikus daiteke. Kobazuloan zehar Jentilzubitik hurbil azaleratzen den erreka bat doa. Haitzuloa handia da, eta barnean hainbat solairutan banatutako galeriez osatzen den sekulako labirintoa dauka.

Jentilzubira igotzean Axlorko babeslekua ikus daiteke. Gaur egun burdin sare batez babestuta dago. Balio historiko handia du, Bizkaiko arkeologia-aztarnategi zaharrena baita, Musteriense garaikoa hain zuzen ere.

Ibilbide erraza eta polita da. Oso egokia da umeekin egiteko. Kobazuloetan sartzeko aukera ere badago. Ez ahaztu linterna!

Argazkiak: Julen Landa eta Txen Meng.