Ba al zenekien pottokei “mamuten garaiko zaldiak” ere deitzen zaiela? Euskal Herrian Paleolito garaitik bizi izan den zaldi-arraza zaharrena da pottoka, eta, duela urte gutxira arte galzorian egon bazen ere, gure herriaren historian eta kulturan arrasto sakona utzi duen ondare bizia da.

Ondare hori herritarrengana hurbiltzeko asmoz, Arantzazu Parketxeak eta Pottokaleku Pottokaren Interpretazio Zentroak familia osoari zuzendutako jarduera berezia antolatu dute elkarlanean. Helburua da euskal zaldi autoktono hau ezagutaraztea, naturarekiko eta animaliekiko errespetua sustatuz.

Jarduera uztailaren 12an, igandean, egingo da Pottokalekun (Arantzazu), Aizkorri-Aratz Natura Parkearen bihotzean. Goizeko 11:00etan hasiko da, eta bi ordu inguruko iraupena izango du.

Lehenik, parte-hartzaileek pottoken historiari, ezaugarriei eta bitxikeriei buruzko azalpen dinamikoa jasoko dute. Ondoren, pottokak protagonista dituen euskal kondaira baten bidez, animalia hauen eta gure kulturaren arteko lotura ezagutzeko aukera izango dute.

Bigarren zatian, bisitariek Pottokaleku zentroan bizi diren pottokekin harreman zuzena izango dute. Animaliak orraztu, laztandu eta elikatzeko aukera izango dute, baita uhalak jartzen eta gidatzen ikastekoa ere. Gainera, etxeko txikienek pottoken gainean ibiltzeko esperientzia izango dute, familia eta lagunartean udako goiz berezi batez gozatzeko.

Jardueraren xehetasunak:

  • Eguna: uztailaren 12a, igandea
  • Hasiera: 11:00
  • Iraupena: 2 ordu inguru
  • Lekua: Pottokaleku (Arantzazu)
  • Prezioa: 17 euro; 3 eta 12 urte bitarteko haurrentzat, 13 euro.

Antolatzaileek gogorarazi dute aldez aurretik izena ematea ezinbestekoa dela, plazak mugatuak baitira. Era berean, mendiko edo naturagunerako oinetako egokiak eramatea gomendatzen dute.