Ze lotura dute hozkailu  eta liburu batek?  Liburuak hozkailuan sartu? Eta hozkailua kalean? Gau eta egun?

Bai! Oiartzungo Abaraxka ludotekakoek martxan jarri duten egitasmoa da frigoliburutegia.

1. Nola sortu zen frigoliburutegiaren ideia?

Abaraxka Ludotekan proiektu ezberdin asko sortzen ditugu, eta hauetako beste bat da Frigoliburutegia. Liburuak kalean uztearen ideia ezagutzen genuen baina egun batean artikulu bat irakurri genuen eta bertan frigoliburutegi kontzeptuaz hitz egiten zen. Hauxe zen guk behar genuena. Liburuak kalean nonbait eduki bai, baina babesean, bustitzeko beldurrik gabe. Berehala hasi ginen ideia honekin lanean eta martxan jartzeko beharrezkoak ziren pausuak ematen (hozkailua lortu, baimenak eskatu, liburuak lortu, erabilpen arauak pentsatu, hauek zehaztu…)

 

2. Zein da liburutegi honen helburua?

Ekimen honen helburuak hiru dira bereziki: irakurzaletasuna bultzatzea, eta baita berrerabilpena eta trukea. Honetaz gain uste dugu gure haurrekin eta baita herrian ere hainbat balore ezberdin lantzen direla ekimen honen bitartez: kontsumismoa, konpartitzea, denona den zerbait zaintzea…

3. Edonork hartu eta utzi ditzake liburuak frigorifiko barruan?

Orokorrean Abaraxkako kideak zaindu, behatu eta betetzen dugu Frigoliburutegia, baina edozeinek hartu eta utzi ditzake liburuak, eta halaxe izaten da gainera. Gau eta egun kalean dagoenez edozein etorri eta betetzen du Frigoliburutegia eta era berean bertan dagoena gustuko badu eraman. Bertan dauden liburuak, normalean haurren altuerara hauei zuzendutakoak uzten ditugu eta gorago helduentzat. Honela, herritarrek, bertan gustuko duten libururen bat ikusten badute, hartu eta etxera eraman dezakete. Era berean etxean behar ez dituzte liburuak ekar ditzakete, edo eta beraientzat esanguratsua den liburua ere partekatu dezakete beste herritarrekin. Beti ere kontuan izanik, bertan uzten duten liburua seguraski ez dutela berreskuratuko.
Herriko liburutegiarekin ere harreman zuzena dugu eta beraiek ere deitzen digute katalogoz kanpo dituzten liburuak emateko. Beharrezkoa denean garbigunera ere joaten gara liburu bila.

4. Egitasmoa ez da berria, nolakoa izan da orain arteko esperientzia?

Egitasmo hau 2014ean jarri genuen martxan. Erabilerarekin hozkailuko ateak hautsi eta dagoeneko hirugarrena dugu aurtengoa.
Jende askok erabiltzen du. Ez haurrek bakarrik, helduak ere bertaratzen dira.
Jendeak Abaraxkara deitzen du frigoliburutegia non dagoen galdezka, batzuk ludotekako atean uzten dituzte liburuak guk kudeatu ahal izateko. Esperientzia oso ona da, jendeak asko zaintzen ditu liburuak. Polita izaten da uda partean bereziki jendea bertatik liburuak edo ipuinak hartu eta ondoan eseri eta liburuak irakurtzen ikustea.

5. Gune finkoaz gain beste liburutegi mugikor bat ere jarri duzue. Nork eta nola kudeatzen ditu hozkailuak?

Urte pare batez bi Frigoliburutegi izan ditugu, bat finkoa Abaraxka Ludotekako atean eta bestea mugikorra herriko auzoetan zehar. Oiartzunen 8 auzo ditugu eta hauetan zehar ibiltari izan dugu. Herriko udal brigadak eramaten zuen auzo batetik bestera eta Abaraxkako kideon ardura zen eraman aurretik hustu eta jarri ondoren betetzea, baita hilabetean zehar begiratu eta bertako liburuak nola zeuden ikustea. Hautsiak kendu, berriak jarri…. Aurten bat bakarra jartzea erabaki dugu, eta hau Abaraxka Ludotekan dago finko.

Frigoliburutegiaren helburu berdinekin 2017ko Oiartzungo udaleku irekietan matrikulatu diren haur eta familia guztiei liburu bana oparitu diegu. Herriko liburutegitik hartu ditugu liburuak eta matrikula egin dugun bulegoan jarri ditugu bi astez jendeak har ditzan. Denetarik izan dugu, komikiak, helduentzat liburuak haurrentzat, euskaraz, gaztelaniaz…. 450 bat liburu banatu dugu.