Bullyinga eta ziberbullyinga: detekzioa eta esku-hartzea izeneko ikastaroa ematen ari da Rakel Gamito Gomezek (Arrasate, 1984). UEUk Nafarroako Gobernuaren laguntzarekin antolatutako ikastaroa izan da eta online ematen ari da urria eta azaroa bitartean. Hezkuntza Zientzietan doktorea da Gamito eta EHUko Hezkuntza eta Kirol Fakultateko irakaslea da Didaktika eta Eskola Antolakuntza Sailean. IkHezi ikerketa-taldeko kidea ere bada eta haren lan-lerro nagusiak dira teknologia hezigarria, gaitasun digitala, irakasleen hasierako formakuntza eta ikaskuntza-zerbitzua. UEUko Pedagogiako sailburua ere bada.

Bullying- eta ziberbullying-kasuek gora egin dutela erakusten dute datuek.

Bai, azken urteetan ikerketek argi erakutsi dute goranzko joera bat dagoela. Sare sozialen erabilera masiboak eragin zuzena du, jazarpena ikasgelatik kanpo gertatzen delako. Adibide modura, nazioarteko txostenek adierazten dute ikasleen herenek bullying egoeraren bat pairatu dutela noizbait, eta gero eta ohikoagoa dela ziberbullyinga. Erronka handia da eta guztion ardura da horri heltzea.

Nola eragin hezkuntza-esparruan? Prebentzioaz, detekzioaz eta esku-hartzeaz hitz egingo duzu.

Arazoak lotura zuzena du hezkuntzarekin edo, hobeto esanda, hezkuntzaren inguruko ekosistemarekin. Horregatik, funtsezkoa da bertan prebentzioa, detekzioa eta esku-hartzea lantzea. Alde batetik, eskolak bizikidetza positiboa sustatu behar du. Bestetik, irakasleek jazarpen-egoeren seinaleak antzemateko formakuntza izan behar dute eta ikasleekin konfiantzazko giroa eraiki behar dute. Azkenik, protokoloak argiak izan behar dira eta, esku-hartzea beharrezkoa denean, komunitate (ikasle, irakasle eta familia) osoa inplikatu behar da eta modu koordinatuan aritu behar da.

Zeintzuk dira erronka nagusiak?

Erronka nagusietako bat da mitoak eta aurreiritziak gainditzea: askotan bullyinga txantxa gisa edo “umeen gauza” gisa ikusten da, baina ez da horrela. Bigarren erronka da ziberbullyingaren ezaugarri berriei aurre egitea: anonimotasuna, denboraren eta espazioaren mugarik eza, eta sare sozialen eragina. Eta hirugarren erronka nagusia da hezkuntza-komunitate osoaren inplikazioa lortzea, hausnarketa sakonaren zein protokolo argien bitartez.

Ueu.eus webgunetik ekarria. Hemen.