Ekialdetik begiratzen zaionean duen formagatik esaten zaio Getariako arratoia edo sagua San Anton mendiari. Euskal Herriko itsasertzeko gune ezagunenetariko bat da eta aisialdirako leku egokia familia osoarentzako.

Landare mota ugari —bertakoak eta exotikoak— dituen parke natural interesgarria du. Uhartea izan zen XV. mendera arte. Orduan lotu zuten herriarekin istmo artifizial bat eraikita.

Getariako kaitik abiatzen da itsasargira igotzen den bidea. Hortik ematen omen zuten baleen edo ekaitzen etorreraren berri. Oinezkoentzako bidea da. Soilik baimendutako ibilgailuak igo daitezke goraino.

Itsasargia utzi eta gorako bideari jarraituz, mendi puntu garaienera iritsiko gara eta Katxapo izeneko eraikuntza txikiarekin egingo dugu topo. Tontor horretatik, Euskal Herriko kostaldearen zati luze bat ageri da. Zeru garbiarekin Matxitxako lurmuturra ikusten da.

Natur gune ederra da San Anton mendia. Bidexka ugari dago eta jolaserako leku aproposa da neska-mutikoentzako.

Eserlekuak, zaborrontziak eta aterpe txiki bat ere aurkituko ditugu. Pena da, baina itsasargia itxita dago publiko orokorrarentzako.

Bide beretik egin behar da behera.