Aski ezaguna da Sara herria. Lapurdin kokatuta, mugaz gaindikoa den Xareta eskualdea osatzen du Ainhoa, Urdazubi eta Zugarramurdi herriekin batera.

Leku zoragarria da; lasaia eta paraje ederrak dituena. Merezi du bisita, zalantzarik gabe.

Hura ezagutzeko joko-pista interesgarria dago, gainera, prest. Familia guztiak oinez egiteko pentsatua, bi ordu eta erdiko ibilbidea da osorik osorik egiten bada. Herria, bere historia, bere kultura eta bere hizkuntza molde dibertigarrian ezagutzeko gonbidapena da.

Eskutitz bat da jokoaren abiapuntua eta altxor bat atzematea da proposamena. Hamabi geldiunez osatutako ibilbidea da eta bakoitzean bi asmakizun proposatzen dira. Ibilbidean zehar ikusiko dituzuen QR kodeak eskaneatu beharko dituzue argibideak lortzeko, eta ez ahaztu saratarrak ere laguntzeko prest izango dituzuela.

Sarako plazan kokatuta dagoen herriko etxea eta bertan turismo bulegoa. Hori duzue ibilbidearen hasiera puntua.

Olhain ikastolako gurasoek asmatu dute jokoa herriko etxearen, turismo bulegoaren eta herriko merkatarien laguntzarekin.

Informazio gehiago saranastian.eus edo xareta.eus