Sarri aipatu dugu sare sozialek beste aurpegi bat dutela erabilera okerra eginez gero, eta oraingoan Kataluniako Unibertsitate Irekiak egin duen ikerketa baten berri eman nahi dizuegu. Ondorioztatu dutenez, Instagram erabiltzeak areagotu egiten du elikadura-portaera-nahasmenduak izateko arriskua, neska gazteen artean.

Gaia ez da berria, baina unibertsitateko adituek esan dutenez, muturreko argaltasuna sustatzen duten talde antolatuak daude Instagram-en. Horren adibide da #proanorexia edo #probulimia traolak erabiltzen direla sarean. Eta Desiré Montes ikertzailearen arabera oso zaila da horien kontra egitea, traolen konbinazioak infinituak direlako, baina azaldu du ezinbestekoa dela elikadura-jokabide kaltegarrien apologia egiten duten mugimenduen aurka egiteko neurriak eta tresnak ezartzea.

Informazio lagungarria emate aldera, Bartzelonako Sant Joan de Deu Ospitaleko erabiltzaileek eta profesionalek dekalogo bat egin berri dute sare sozialetan osasunaren inguruko artikuluak egoki identifikatzeko.

Zeri erreparatu osasunaren gaineko artikuluetan

  • Egilea nor den egiaztatu eta argitalpen-data berrikusi.
  • Ez fidatu titular deigarriekin.
  • Erreparatu diseinuari eta ikusi ea ortografia akatsik dagoen.
  • Informazio iturria ikertu.
  • Ebidentzia zientifikorik ote dagoen ikusi.
  • Ez sinetsi ikusten duzun guztia; argazkiak moldatuta egon daitezke.
  • Egiaztatu. Albiste faltsuek zure emozioak baldintzatu ditzakete.
  • Ez fidatu errezeta edo botika magikoez.
  • Kontuan izan dietak eta sendagaiak profesionalek errezetatzen dituztela.
  • Ziurtatu informazioa beste hedabide batzuetan argitaratu dela.