Internet zer den eta horrek zein arrisku dakartzan jasotzen dute Internet familian: erabilera seguru baterako jarraibideak izeneko gidek. Eusko Jaurlaritzako Familia eta Haurren Zuzendaritzak aurkeztu ditu eta aplikazioen eta sare sozialen erabilera egokirako laguntza eta orientazioa eskaintzen dute.

Adingabeen garapen-etapen arabera antolatuta daude: 0-3 urte, 4-6 urte, 7-9 urte, 10-12 urte, 13-15 urte, eta 16-18 urte, eta deskargatzeko moduan daude.

Gida hauen helburua da adingabeen adinari egokitutako jarraibide batzuk eskaintzea informazioaren eta komunikazioaren teknologiak (IKTak) arduraz eta segurtasunez erabiltzeko. Baina, betiere teknologia berriak aukeragune gisa ikusita (erabilera-denboran oreka mantenduta eta beste jarduera batzuk alde batera utzi gabe), eta ikasteko eta garatzeko, eta berdinekiko eta gizarteko gainerakoekiko harremanak errazteko gune gisa.

Grooming, ciberbullying, sexting, phishing eta antzeko terminoak azaltzeaz gain, egoera horiei heltzeko moduaren inguruan orientatzen da.

Sare sozialak eta teknologia berriak plaza publiko digital global handia bihurtu dira. Bertan, bereziki nerabeek beren nortasuna eraikitzen dute, jendea ezagutzen dute, gauzak probatzen dituzte, beren burua erakusten dute eta arriskuak hartzen dituzte. Kalean beren burua zaintzen irakasten diegun bezala, zaintza horiek ingurune digitalean transmititu behar dizkiegu. Giden bilduma honek familiei prozesu horretan lagundu nahi die.