Leire Azpiazu erizainak seme-alaben loaldiari buruzko artikulua idatzi du Puntua aldizkarian. Hauxe da bere kolaborazioa:

Etxeko txikiek tapatuta lo egitea ez dutela atsegin ez da sekretu bat. Batzuk oheratzean estali egin daitezke eta beste batzuek ez dute atsegin estalita egotea hasiera batetik. Zergatik? Arrazoi nagusia: haurrak lo daudenean mugitu egiten dira, eta, beraz, estali gabe egoten dira berehala. Haur batzuek izerditu ere egiten dute lo dauden bitartean, eta hori beste arrazoi bat izan daiteke, edo, beste barik, deseroso sentitzen direlako.

Uda garaian edo kanpoko tenperaturak oso baxuak ez direnean, ez diogu inportantzia handirik ematen horri, baina hotza ate joka izaten dugunean, berriz, ardura pixka bat izaten dugu umeak hotza izango duen edo ez.

Edozelan ere, beste alde batetik, batzuetan, gauean lotarako arropa egokirik ez baldin badute, esnaldiak gerta daitezke. Horregatik esaten dugu lotarakoan giroa zaintzea oso garrantzitsua dela. Bai tenperatura baxuekin eta baita altuekin ere, bi kasuetan gerta daitezkeelako esnaldi horiek.

Lo-zakuen ezaugarriak

Horrenbestez, hotz egiten duenean zer jarri beharko zenioke zure haurrari? Lehenengo eta behin, kanpoan hotz egin arren, zure etxean dagoen gutxi gorabeherako tenperatura zein den jakin behar duzu, eta horren arabera erabaki zenbat arropa jarri behar diozun. Orokorrean, body bat eta pijama bat jartzea izaten da egokiena, eta, horren ostean, lotarako haurren zakuak erabili ditzakegu.

Merkatuan era askotariko lo-zakuak daude: alde batetik, mahukarik gabeak eta mahukadunak; beste alde batetik, hankak dituzten zakuak eta ez dituztenak.

Egokitasuna aintzat

Jaioberriak direnetik katamarka hasi arte, beharbada, hankarik gabeko zakuak erabiltzea da egokiena, nire ustez. Azken finean, fardela aldatu behar denerako lagungarri izango zaigu mota horretako lo-zaku bat. Baina haurra gehiago mugitzen hasten denerako, zalantzarik gabe, hankaduna izango da egokiena. Lo dagoen bitartean gero eta gehiago mugituko da, eta hankarik gabe zakuarekin trabatu egin daiteke eta horrek esnaldia eragin dezake.

Kontuan izan beharreko beste datu bat zaku horien lodiera da. Datu hori TOG eran ikusiko duzue. TOG delakoak zakuaren lodiera nolakoa den esango digu; zenbat berotuko duen, alegia. Berriz ere etxe giroko tenperatura kontuan izan beharko dugu, baina, orokorrean eta ia gehienetan, 1.0 duen lodiera nahikoa izango da haur guztientzat.

Nola jakin umearen tenperatura

Zaku horren azpitik pijamaren bat nahikoa izan daiteke, baina body bat ere jar diezaiokegu, beharrezkoa dela uste badugu. Merkatuan, gaur egun, 8 urte arte daude lo-zakuak, gutxi gorabehera –115-140 zentrimetrora arte, hain zuzen ere–.

Bularraldean edo bizkar atzealdean ukitu beharko dugu haurra, hotzik duen edo ez jakiteko. Gainera, norberak dituen sentsazioak ere lagungarriak dira; zuk zeuk ere hotz pixka bat nabaritzen baduzu, ziur aski, zure seme-alabak ere sentsazio berberak izango ditu.