Emaizeko Maider Garcia de Vicuña sexologoak sexualitatea hobetzea izan du hizpide Puntua aldizkarian argitaratu duen azken kolaborazioan.

Hala da, uda amaitu eta, pixkanaka, erritmoa hartzen hasi behar. Iraila eta urtarrila asmo onen garaia izaten da; hasiera berria, eta, ziurrenik, zenbait erronka hartzeko prest zaude: kirola egin, elikadura zaindu, urteetan ikusi gabeko lagun horiekin planen bat egin, diru pixka bat aurreztu… Zerrenda horretan zure sexualitatea hobetzea agertzen al da?

Gehiengoen zerrendan ez da sexualitatea agertuko. Agian, bai gehiago ligatzea, larrutan gehiagotan egitea… Baina hori gure sexualitatearen parte txiki bat besterik ez da; oso garrantzitsua, baina ez da guztia.

Gorputza maitatzearen garrantzia

Gure gorputza sexualitatearen oinarria da. Gorputzaren bitartez sentitzen dugu. Bertan sumatzen ditugu desioa eta gozamena, gorputzarekin ditugu harremanak besteekin egunero eta hura da gure barnean duguna adierazteko tresnarik baliagarriena.

Gorputzarekin gustura sentitzea ezinbestekoa da sexualitatearen bestelako dimentsioak positiboan bizitzeko. Gure desio, behar, gozamen, sentsazio, emozio eta lotura nahiarekin erabat loturik dago eta, etxe bat eraikitzean oinarri sendoak behar diren moduan, sexualitateak gorputza positiboan errotuta behar du. Gure begirada gustuko ez ditugun ataletan, edertasun ereduarekin bat ez datozen parteetan finkatzean, min egiten diogu. Dugun erreminta garrantzitsuena balioetsi egiten dugu, kritikatu, gaizki tratatu… Eta askotan, gure zerrendan dauden ligatze eta larrutan egite horietara minduta goaz.

Nola gozatu nire gorputza biluztean lotsa sentituz? Nola gozatu besteak itsusia dudan horretan arreta jarriko dutela pentsatuz? Nola gozatu besteen arreta merezi ez dudala sinesten badut gizarte eredua ez dudalako betetzen? Horrela ez gara aske sentituko.

Eredu erotikoaren nekea

Jendarte gisa barneratuta dugun eredu erotikoak ere askatasuna murrizten digu. Aldaketa izugarriak gertatzen ari dira belaunaldiz belaunaldi eta normaltzat hartutako gauza asko gaur ez ditugu onartzen; lehen trastorno kontsideratutako asko izate sexudun izatearen naturan daudela ezagutu dugu. Baina aurretik dugun bidea luzea da oraindik.

“Gizonek emakumeek baino desio gehiago dute. Tutorialen bidez –edota lagunen bizipenen bidez– ikasiko dut besteei plazera ematen, guztion desioak berberak direlako. Larrua jotzea gimnasia egitea bezala da. Oihu egitea orgasmoaren sinonimoa da. Semenaren isurketarekin bukatzen da harremana. Gizon homosexualak lizunak dira. Lesbianek plastikozko zakilak erabili behar dituzte. Koito baginala egin daitekeen joko-erotiko hoberena da. Baginan zerbait sartu behar da emakumezkoek gozatzeko. Zakilak beti tente egon behar du. Menopausian desioa desagertzen da. Koitorik ez badago, ez da benetako harremana. Gizon homosexualen ipurdia sentikorragoa da. Preliminarrak beharrezkoak dira, partidu aurretik berotzea bezala. Konfiantza dugunean ez da beharrezkoa zer dudan gustuko adieraztea, besteak badaki. Desio onak eta txarrak daude…”.

A ze nekea hau guztia zerrendatzea… Eta neke handiagoa zama honekin bizitzea, ezta?

Sexualitatea, desioa, fantasiak, gozamena, elkartze grina… gizakia bezain zaharrak dira, naturalak, propioak. Mende askotan zehar eredu erotikoa boterea izan dutenek eraiki dute: agintariek, apaizek, medikuek… Euren begiradapean, euren iritzi eta gustuak normaltzat hartuz eta ezberdinak direnak patologizatuz; hortaz, sortutako eredua heteronormatiboa, patriarkala, sexista, koitozentrista, genitalista… izan da.

Lehen atakean ideia horiek ez ditugula esango genuke, baina zenbateraino eragiten digute oraindik ere gure intimitate erotikoan?

Buruari galdezka

Joko bat proposatzen dizuet, Tiktok sarean egiten diren horien antzera. Altxa esku bat eta jaitsi hatz bat hauetakoren bat pentsatu/egin baduzu:

  1. Nire bikotekideak gustuko dudana jakin beharko lukeela pentsatu dut, egin duena gustatu ez zaidanean.
  2. Zerbaiterako desioa izanda, ez dut esan; lotsagatik, besteak pentsatuko zuenagatik, gaizki zegoela pentsatu dudalako.
  3. Koitoa eginda orgasmoa sentitu ez dudanean, arazoa ni naizela pentsatu dut.
  4. Noizbait, sexu orala ondo egiteko tutorial antzeko bat ikusi/irakurri dut.
  5. Pertsona heterosexualek eta homosexualek gorputz atal batzuetan sentikortasun ezberdina dute.
  6. Norbaitekin musukatu, ukituak egin, miazkatu… banaiz, sexu-harremanak ez ditudala izan pentsatu/esan dut, ez dugulako guztia egin.

Hatzen bat jaitsi duzu? Agian, eredu erotiko zahar horren eragina hor dagoela konturatu zara? Dena gaindituta duzu? Segi zuek jokatzeko gogoz bazaudete. Elkartze erotikoa –baita bakarkako erotika ere joko bat da. Gozatzekoa. Arauak momentuko jokalariek adostu behar dituzte, ez kanpotik hartu. Ez da gimnasia egitea, desioekin konektatzea baizik. Gure larruaz gozatzea, ez soilik genitalez. Gure gorputzetan eta gorputzekin aske izatea.

Erronkari heltzeko prest?