Suedia bederatzigarren herrialdea da irakurtzeko ulermen onena adierazten duen PIRLS txostenean eta “analfabeto funtzionalen” belaunaldi bat sortzeko arriskuaz ohartarazi du.

2023an bizkortu behar zuen gelen digitalizazio-plana Suediak, baina geldiarazi egin du. Herrialdeak hilabeteak zeramatzan ordenagailuek eta pantailek eskoletako ikasgeletan duten eragina eztabaidatzen eta zalantzan jartzen. Azkenean, Hezkuntzako ministro Lotta Edholm-ek maiatzaren 15ean iragarri zuen bertan behera uzten zuela Hezkuntza Agentzia Nazionalak abenduan onartutako hezkuntza digitalizatzeko estrategia.

Suediako ‘Expressen’ egunkarian abenduan argitaratutako artikulu batean, Edholm ministroak bere mesfidantzak adierazi zituen ikasgeletako pantailen onurei buruz. Bere ustez, digitalizazioa “esperimentu bat” da, eta bere haserre agertu zen “edukietan garrantzirik jarri gabe digitalizazioa zerbait positibotzat jotzen duen jarrera akritikoengatik”. Edholmek defendatu zuen liburuek “tabletek ordezkatu ezin dituzten abantailak” dituztela.

Jakin ahal izan denez Ministroak ikasgelen digitalizazioari buruzko txostenak eskatu zizkien 60 aditu baino gehiagori, besteak beste, Karolinska Institutuari. Erakundeko iturriek baieztatu dutenez guztiek ondorio bera atera zuten: “Umeen garuna aztertzeko egin diren ikerketa guztiek erakusten dute pantailen erabilerak ez duela onurarik irakaskuntzan”.

Hain zuzen ere, Edholm-ek pantailei egotzi die PIRLS txostenean erregistratutako haur suediarren irakurmen-mailaren beherakadaren errua, nahiz eta Suedia –544 punturekin– Europako batez bestekoaren gainetik egon –528 puntu–.

Ministroak irakurmen-maila handitzeko neurriak hartu behar direla defendatu du. “PIRLS txostenak argi adierazten du Suediako eskoletan irakurketa-krisia dugula. Etorkizunean, Gobernuak testuliburu gehiago eta pantaila-denbora gutxiago ikusi nahi ditu eskolan”.

Europako herrialde gehienetan lehen mailako helburua da eskolen digitalizazioa bizkortzea. Debatea zabalik dago.

Albistearen iturria hemen.

Argazkiaren iturria: Compare Fibre.