Zer da eta nola sortu zen Tantantxo.eus egitasmoa?

Unibertsitateko Ikus-entzunezko laugarren maila burutzen gabiltza eta “Formatu eta eduki
berriak” deituriko sekuentzia edo ikasgai batean ikerketa sakon bat egin behar izan genuen
proiektu bat zerotik hasteko. Eta horrela konturatu ginen genero rol eta estereotipo
tradizionalak jorratzen dituen eduki didaktikoaren falta handia zegoela. Horregatik, gai guzti
hauek auzitan ipini eta hezkuntza berritzaileago bat zabaltzea izan zen gure helburua.
Beraz, Tantantxo sortzea pentsatu genuen.

Tantantxo mundu errealean bizi den genero gabeko fikziozko pertsonaia da. Haurren artean
gertatzen diren egoeren aurrean hainbat galdera planteatzen ditu eta beste pertsonai erreal
baten laguntzarekin egoera ezberdinei irtenbide bat ateratzen saiatzen da.

Tantantxo genero gabeko pertsonaia denez gaur egun, generoari lotuta dauden tradizio eta
pentsaera asko auzitan jartzen ditu, gure gizartean barneratuta dauden jarrera asko ulertzen
ez dituelako. Oso ulerkorra eta pentsaera irekia duen pertsonaia da eta ume guztiak pozik
egotea da bere helburu nagusia. Ume horiek neska edo mutilak izanik, nahi dutena egiteko
libre direla transmititu nahi du, errespetuz beteriko ingurune bat eraikitzen duten bitartean.

Nortzuk zaudete egitasmo honen atzean?

Mondragon Unibertsitateko Ikus-entzunezko Komunikazioko laugarren mailako sei
ikaslek osatzen dugu; Maider Arrotxa, Andrea Aranburu, Ainhoa Lopez de Arregui,
Xabi Perez, Eider Uribarri eta Andrea Vitoria.

Nori zuzendua dago egitasmoa?

Hezitzaile zein 2 eta 10 urte bitarteko umeentzako bideratuta dagoen plataforma didaktikoa
da. Gurasoei eta hezitzaileei eskainiko diegu edukia, eta hauek, hainbat informazio eta
material izango dute eskuragarri gure web-gune didaktikoaren bitartez. Honekin, hainbat gai
desberdinen inguruan ikasi eta beraien seme-alabekin zein ikasleekin banatzeko aukera
izango dute; adibidez, berdintasuna, genero rolen abolizioa, LGTBI+ komunitatearen
inguruko informazioa, etab.

Informazio horretaz gain, erakunde desberdinetako profesionalek egindako bideoak
eskainiko dira gure gaia azaldu ahal izateko, eta etxeko txikiengan gai hauek nola barneratu
ahal diren laguntzeko.

Generoaren gaia landu duzue Tantantxorekin. Jendartean dagoen behar bati
erantzun nahi diozue?

Generoaren gaia lantzea ezinbestekoa iruditzen zitzaigun. Izan ere, gizartean betidanik
sistema binario batean oinarritutako heziketa eta bizimodua jasan izan delako, hau da, bi
genero soilik existitzen diren gizartea. Gaur egun, ideia hori aldatzen doa poliki poliki, ordea,
lantzeko asko dago oraindik eta, hori dela eta, guk ere gure laguntza eskaini nahi izan dugu.
Gainera, uste dugu binarismo kontzeptu hori txikitatik ezabatzea dela egokiena, era batean,
belaunaldi berri bat sortzeko zeinak errespetua eta aniztasuna izango duen oinarri moduan.

Bideoak, abestia, ipuinak… modu ezberdinetan landu duzue gaia.

Azkenean unibertsitatean ikasitako hainbat ikus-entzunezko desberdin erabili ditugu proiektu
konplexuago bat sortzeko. Gaur egun geroz eta gai edo erabilera gehiago sortuz, proiektu
erabilgarriagoa eta erakargarriagoa sortzen da. Honekin, adin guztietara iristeko aukera
ematen digu eta hori da guretzat garrantzitsuena; bakoitzak bere txokoa edukitzea.

 

Bizirik dagoen webgunea izango da? Elikatzen jarraituko duzue?

Hori da gure helburua. Azken finean, gaur egungo gizarteak horrelako proiektu bat behar du
aurrera jarraitzeko eta heziketa zabal bat izateko. Honekin batera, gure proiektua
ezagutarazi nahi dugu ikastoletan. Txikietatik hasi eta helduetara iritsi arte. Hori lortzerakoan
gure proiektua lantzen jarraitzea dugu helburu.