TikTok-ek, formatu laburreko bideo mugikorren plataforma liderrak, eta Pantallas Amigasek gurasoentzako TikTok gida sortu dute.

Gidaliburua adin txikikoen ardurapean dauden pertsona helduek TikTok hobeto ezagutzeko asmoz sortu dute. Bertan funtzionalitateak hobeto ezagutzeko eta dokumentatzeko aukera izango dute gurasoek, “euren seme-alaba nerabeen ongizatea sustatuko duen plataformaren erabilera arduratsua sustatzeko, haien segurtasuna eta pribatutasuna bermatuz”, azaldu dute Pantallas Amigas-etik.

Gidaren hamahiru ataletan, plataformari buruzko alderdirik oinarrizkoenak azaltzen eta aztertzen dira, adibidez, irakurri ahalko da zer den TikTok, zeintzuk diren eman beharreko lehen urratsak, gai zehatzagoetan sakontzeko aukera ere ematen du, eta bertan ezagutu ahal dira esaterako, familia sinkronizatzeko tresnak, iruzkinen iragazkia edota blokeatzeko edo salatzeko aukerak zeintzuk diren.

Pantallas Amigas-etik adierazi dute hezkuntza digitala dela hain justu “biharko gizartea garatzeko gakoa”.

Horregatik, segurtasun digitalaren arloko prestakuntza “funtsezkoa da etorkizuneko mundua eraikitzeko”, diote. Ildo horretan, gidak erabiltzaile gazteenak babesteari buruzko atal bat ere badu.

Gida osorik irakurtzeko aukera daukazue hemen. Gazteleraz da.