Arrasaten, Udaleko Euskara Sailak eta Txatxilipurdi elkarteak Freskura egitasmoa  antolatu dute aurten ere, helburua euskarazko irakurgai eta jolasak  aisialdi guneetan eskura jartzea da, kasu honetan igerilekuan.

Mahai jolas eta aldizkari ezberdinak maileguan eskaintzeaz gain, aurtengoan Arrasateko Bibliotekarekin elkarlanean bertako irakurgai ezberdinak ere eskaini dituzte.  Komikiak aukera polita dira  igerilekuan irakurketaz  gozatzeko eta honela ekarri genuen Superpatata komikia  aurreko sarrera batean.

Gaurkoan klasiko bat nabarmendu  nahi dugu, Tintinen Abenturen liburu bat aurkituko dugu aste honetako Bibliotekako proposamenean, “Ilargia helburu” izeneko liburua ain zuzen ere. Aitzakia polita  guraso askoren iruditegian dagoen pertsonaia berreskuratu eta aztertzeko.

“Tintinen Abenturak” komiki sail bat da, Georges Remi Hergé kazetari eta idazle belgikarrak sortutakoa. Tintin kazetariaren abenturak, 1929an hasita, 24 liburukitan zehar munduko hizkuntza askotara itzuli dira, euskarara tartean.  Gaurkoan aurkeztu duguna eta Freskura egitasmoko  postuan aurkitu daitekeena  Ilargia Helburu izenekoa da, 2020an liburu honen  itzulpen berria argitaratu zen euskaraz.

Tintinen abentura honetan ere beste liburuetan agertzen diren eta ezagutzen ditugun pertsonaiak ikusiko ditugu, Tintin eta Milu, Haddock kapitaina, Dupond eta Dupont polizia inspektoreak…

1960ko hamarkadan kokatutako istorioa da hau. Ilargira joateko egiten diren prestaketan parte hartzen dute tintin, Haddock eta Turnesol profesoreak, izan ere, astronauta bezala abiatu nahi dute ilargira.

Bitxikeria

Tintinen Abenturen sorrera bitxia da, 1929ko urtarrilean argitaratu zen Tintinen lehen komiki atala, Belgikako Le Vingtième Siécle egunkari katolikoak gaztetxoentzat kaleratzen zuen gehigarrian. Lehen abentura (Tintin sobieten herrialdean) aldizkari horren zuzendari Wallez apaiz integristaren eskariz egin zuen, gazteen artean komunismoarekiko gorrotoa pizteko. Hergé berak uko egin zion bizi zen artean liburuxka hori berrargitaratzeari. Horregatik, gaur egun Tintinen abentura guztietatik koloretan argitaratu gabe dagoen bakarra da.