Ikaselkar hezkuntza argitaletxeak Kuku! emozio bildumako azken bi album ilustratuak argitaratu ditu, tristura eta nazka ardatz hartuta. Modu horretara, oinarrizko sei emozioak lantzeko –haserrea, sorpresa, poza, beldurra, tristura eta nazka– ipuin bana daukate irakurleek bilduma horretan, emozioak lantzeko beste horrenbeste horma-irudi eta jolasekin batera.

Tristurari buruzkoa

Joseba Sarrionandiak idatzi du tristura lantzen duen lana, eta Irrimarra ilustratzaile taldeak hitzak eta irudiak josi ditu.

Nazkari buruzkoa

Peru Magdalena idazleak eta Mikel Valverde ilustratzaileak izan dira nazkaren inguruko ipuina sortu dutenak, Nazkatasuna izenekoa.

2 urtetik gorakoentzat

Kuku! bildumaren baitan, 2 urtetik gorako haurrekin oinarrizko emozioak lantzeko baliabide sorta eskaintzen du Ikaselkarrek. Eta horiekin haurrek aukera izango dute sentitzen dituzten emozioak ezagutzeko, horiei izena jartzeko eta erregulatzen ikasteko. Gainera, pedagogian aditu diren profesionalek proposatutako edukietatik abiatuta sortu dira elementu horiek guztiak.  

Album ilustratuek, eta bildumako gainerako elementuek, QR kodea dute eta, horren bitartez, gurasoek informazio osagarria eskuratuko dute, bertan lantzen den emozioari buruzko argibideak eta erabileraren inguruko jarraibideak jasoz.

Argazkia: Anboto.org.