Txatxilipurdi Elkarteak eta gurasotasunak bat egiten dute hainbat egitasmo, helburu eta proiektutan. Horren adibide da Guraso.eus ekimena. Beste elkargune garrantzitsu bat jolasa da; izan ere, aisia hezitzailea eta etxea uztartzen dituen eremua da.

Bai egitasmo honetan, bai Txatxilipurdi Elkartean, urteak daramatzagu jolasari dagokion balioa aitortu eta sustatzen. Eta 2026-2027 ikasturtean ere bide horretan urrats berriak ematen jarraitu nahi dugu. Baina, zergatik jolasa? Zergatik da hain garrantzitsua?

Horrela ikasten dute askatasunez jolasten dutenean

Jolas librea haurrak beren munduaren esploratzaile bihurtzen diren espazioa da. Ez dago jarraibiderik, ezta aurrez zehaztutako emaitzarik ere: jakin-mina, irudimena eta askatasuna baino ez.

Imajinatzen duteAdierazten duteHarremanak sortzen dituzte
Mundu eta pertsonaia berriak asmatzen dituzte.Sentitzen dutena istorioen eta jolasaren bidez adierazten dute.Partekatzen, elkarlanean aritzen eta enpatia garatzen ikasten dute.

Dena aldatzen duen jolasa

Jolasa ez da denbora-pasa hutsa; irudikatzeko, sortzeko, ikasteko eta harremanak eraikitzeko modu naturala da.

  • Dorre bat eraikitzeak oreka, pazientzia eta kontzentrazioa lantzen ditu.
  • Istorio bat asmatzeak hizkuntza, enpatia eta sormena garatzen ditu.
  • Ideia bat norberaren sorkuntza bihurtzeak autonomia eta konfiantza indartzen ditu.
  • Jolasa partekatzeak entzuten, elkarlanean aritzen eta emozioak adierazten irakasten du.

Eta haurrak ikasten ari diren bitartean, helduak ere hazten dira. Izan ere, jolas librean ez dago denak dakienik eta irakasten duenik; elkarrekin egindako aurkikuntzak, esperientziak eta ikaskuntzak baino ez daude.

Haurrak…Helduak ikasten du…
Mundu berriak irudikatzen dituEntzuten, gidatu gabe
Jarraibiderik gabe sortzen duKontrola askatzen eta prozesuaz gozatzen
Bere istorioak partekatzen dituEnpatia eta lotura berriro aurkitzen
Akats bat ideia berri bihurtzen duEmaitzaren gainetik sormena baloratzen