Egun luzeak eta eguzkitsuak ditugu udan eta haur askok udalekuetako esperientzia bizi izateko aukera paregabea dute.
Udalekuetan neska-mutikoek esparru ez formaleko espazio ludikoa aurkitzen dute. Gehienetan oroitzapen asko eta oso politekin itzultzen dira.
Mota askotako udalekuak ditugu aukeran. Irekiak, itxiak, auzolandegiak, ibilaldiak, trukeak… Tematika ere asko zabaldu da eta aukera handia dago. Udalekuak, gehienetan, esperientzia ahaztezinak bihurtzen dira. Umeek beraien eguneroko bizitzan egiten ez dituzten ekintzak bizi eta gozatzen dituzte. Eta pertsona gisa garatzeko erabat baliagarriak suertatzen dira.
Berdinen arteko harremanak etxetik kanpo
Haurra bere familia ingurunetik urruntzen da aldi baterako, eta ondorioz, egunerokotasunak sortzen dituen behar anitzei aurre egin beharko die, autonomia garatuz. Hala, eguneroko bizitzaren hainbat eremu jorratzeko parada egokitzen da, eta horrek, jarduera hezitzailerako baldintza aproposak ematen ditu. Berdinen arteko harremanak lantzeko aukera aberasgarria da, adiskide berriak eginez eta taldean elkarbizitza eremu batean biziz.
Begiraleen papera
Udako egitasmoen beste ezaugarri esanguratsu bat, begiraleen papera autoritate eredu tradizionalez bestelakoa izan ohi dela da, harreman simetrikoagoak garatzeko eta sentitzeko aukera emanez. Begiraleentzat etengabeko formazioa suposatzen duen lana da eta balioen lanketa egiteko aukera aparta, beraien esperientziatik abiatuta. Izan ere, haur taldeari beraien arteko aniztasunean eta elkarbizitzan laguntzeko, lehendabizi begirale taldearen desberdintasunak onartu behar dira. Beraz, begirale baten formazioan garrantzitsua da norbere pertsonaren lanketa egitea, taldean bizitzeko eta eredu egokiak lantzeko prestatuz. Bestalde, kontuan harturik begirale baten bizitza profesionala ez dela oso luzea izaten, garrantzizkoa da begirale taldeetan halako oreka bilatzea esperintziadun eta berrien artean. Hezitzaileentzat esperientzia sakona da; gizartean parte hartzeko modu bat da alde batetik, eta harreman politak sortzeko gunea bestetik, kasu askotan diru iturria ere badelarik. Dena dela, jendartean hezitzaileen lana ez dago behar beste baloratua, are gutxiago irakasleen lana beste.
Esperientzia sakonak
Horrez gain, ingurune berriak ezagutuz, naturarekin kontaktuan jarri eta esperientzia sakon eta gogoangarria bizi dezakete haur zein gazteek.
Iturria hemen.
Argazkiaren iturria hemen.
