Aktualitatea

Umeen autonomia: eskolara bakarrik zenbat urterekin?

2016-02-01 2 iruzkin

Haurren hiria aldarrikatzen du Francesco Tonucci psikologia ikerlari ezagunak eta dio gaur egungo umeek autonomia asko galdu dutela aurreko belaunaldikoekin alderatuta. Honekin lotuta Armando Bastida blogariak galdera egiten dio bere buruari: zenbat urterekin has daiteke ume bat eskolara bakarrik joaten? Eta hortik abiatuta gogoeta interesgarria egiten du.

2822852591_9088899dbe_z

Tonucciren arabera sei urteko ume bat gai izan behar da eskolara bakarrik joateko. Noski, bere segurtasuna bermatuta dagoen heinean. Bastidak ikusten duena da gaur egungo umeak heldu batek lagunduta joaten direla ia leku guztietara.

Eskolara bakarrik zenbat urterekin?

Bastidaren esanetan Holandan zortzi urteren bueltan hasten dira umeak eskolara bakarrik joaten. Suitzan, berriz, 5-6 urterekin.

Kasu oso deigarria dute Japonian: eskolak erabakitzen du umea nola iritsi behar den eta gaizki ikusia dago haurra gurasoekin batera iristea eskolara. Distantzia handia bada umeak autobusean egingo du joan-etorria, eta txikia bada oinez baina gainerako ikaskideekin batera. Eskola-ibilbideak diseinatzen dituzte. Japonian lehenbailehen bultzatu nahi dute umeen autonomia.

Egia da gure gizartea eta Japoniarra ez direla berdinak. Alde batetik, segurtasun maila hobea da eta umeen zaintza gizarte osoarena da.

Autonomia haurtzarotik sustatzearen garrantzia

Bastidaren esanetan garrantzitsua da umeen independentzia eta autonomia adin txikietatik bultzatzea. “Esparru ezberdinetan bultzatu beharko genuen”, dio. Horretarako onartzen du aldaketa handiak egin beharko liratekeela gure gizartean: oinezkoei eta haurrei egokitutako hiriak beharko genituzke, heldu arduratsuagoak, gidari zuhurragoak, eta oro har errespetu handiagoa.

Utzi autonomo izaten

Autonomia maila handiagoa sustatzeko Bastidak hainbat neurri proposatzen ditu: ahal den neurrian etxeko altzariak eta tresnak umeen ezaugarrietara egokitzea, ez egitea gauzak euren ordez, ikertzeko eta mundua ezagutzeko aukera ematea zikintzeari garrantzirik eman gabe… “Japoniako umeak gureak baino erneagoak dira soilik aukera ematen dietelako eta neurri batean eskatu egiten dietelako”, dio Bastidak.

Artikulua osorik hemen.

Argazkiaren iturria hemen.



2 iruzkin "Umeen autonomia: eskolara bakarrik zenbat urterekin?"

  1. guraso
    gurasocom
    2016-02-01 Erantzun

    Bastidaren hausnarketarekin lotuta, Gernikako egitasmo hau aurkeztu zuten pasa zen astean. Eskola Bidea proiektua Gernika-Lumoko ikastetxe denen elkarlanean garatuko dute eta eragile ezberdinek bultzatutako egitasmoa izango da.

    http://busturialdea.hitza.eus/2016/01/27/umeek-eskolara-bakarrik-joateko-egitasmoa-aurkeztu-dute/

  2. […] Guraso.eus-en irakurri dugunez, Tonucciren arabera 6 urterekin umea gai da eskolara bakarrik joateko, segurtasuna bermatuta baldin badu. Holandan, 8 urterekin hasi ohi dira eta Suitzan, 5-6 urterekin. Japonian, zenbat eta lehenago hasi, hobe dela iritzi diote, autonomia lehenbailehen lantzeko. Haurra eskolara gurasoekin iristea, adibidez, gaizki ikusia dago. […]


Zure iritzia partekatu nahi duzu?

Zure eposta ez da argitaratuko. Derrigorrezko eremuak * bidez markatuta daude.

Utzi erantzuna